«Astana» HQO týraly zańǵa qandaı túzetýler engiziledi

NUR-SULTAN. QazAqparat – Qazaqstanda ınvestıtsııalyq salyqtyq rezıdenttik baǵdarlamasyn qoldaný usynyldy. Tyń usynystyń artyqshylyqtary jóninde Parlament Májilisinde «Astana» halyqaralyq qarjy ortalyǵy týraly» Konstıtýtsııalyq zańǵa túzetýlerdi tanystyrǵan birinshi qarjy vıtse-mınıstri Berik Sholpanqulov aıtyp berdi, dep habarlaıdy QazAqparat tilshisi.

«Investıtsııalyq rezıdenttik baǵdarlama – álemde aıtarlyqtaı keń taralǵan qubylys. Búgin de rezıdenttik baǵdarlamynyń eki túrin usynatyn 80-nen astam osyndaı baǵdarlama jumys isteıdi. Birinshi túri – AQSh, Kanada, Ispanııa sııaqty elderde, sondaı-aq Latvııa men Mysyrda iske asyrylyp jatqan baǵdarlamalar. Olar ınvestıtsııalardyń ornyna turý úshin yqtııarhat beredi», - dedi ol.

Vıtse-mınıstrdiń sózine sensek, baǵdarlamanyń ekinshi túri ınvestıtsııalyq vızany jáne eldiń salyq rezıdenttigin alýdy kózdeıdi. Mundaı elderdiń qatarynda Italııa, Shveıtsarııa, Kıpr men Ulybrıtanııa bar.

«Qazaqstanda baǵdarlamanyń ekinshi túrin – ınvestıtsııalyq salyq rezıdenttigin qoldaný usynylady. Osylaısha, zań jobasynda «ınvestıtsııalyq rezıdent» uǵymy men ınvestıtsııalyq salyqtyq rezıdenttik baǵdarlamasyn engizý qarastyrylǵan. Investıtsııalyq salyqtyq rezıdenttik baǵdarlamasy AHQO aktisimen bekitiledi. Biraq mindetti túrde ýákiletti memlekettik organdarmen, atap aıtqanda, Ulttyq ekonomıka, Syrtqy jáne Іshki ister mınıstrlikteri, sondaı-aq Ulttyq qaýipsizdik komıtetimen kelisiledi», - dedi ol.

Baǵdarlamada ınvestıtsııalaýdyń kólemderi men quraldary, ınvestıtsııalyq salyqtyq rezıdenttikti alý rásimderi anyqtalady.

«Investıtsııalyq salyqtyq rezıdenttik baǵdarlamasynyń negizgi tujyrymdamasy – ınvestorlar men olardyń otbasy músheleriniń Qazaqstanǵa kóprettik kirý vızasyn alýǵa aıyrbastap, ınvestıtsııalar tartý. Áleýetti ınvestorlar AHQO bırjasynda aınalatyn qarjy quraldary men baǵaly qaǵazdarǵa óz qarajattaryn ınvestıtsııalaıtyn bolady», - deıdi Berik Sholpanqulov.

Sondaı-aq zań jobasy boıynsha ınvestıtsııalyq salyq rezıdentterine Qazaqstannan tys kózderden túsken kirister boıynsha jeke tabys salyǵyn tóleýden bosatý usynyldy. Bul rette, Qazaqstannyń ishinde paıda bolǵan kiristerge Salyq kodeksine sáıkes salynǵanymen, shetelden túsken kiristerge salyq salynbaıdy. Berik Sholpanqulov atap ótkendeı, bul óz salyq shyǵystaryn ońtaılandyrýǵa talpynatyn ınvestorlardyń múddeleri úshin jasalýda. Osylaısha, ol eldiń ınvestıtsııalyq tartymdylyǵyn arttyrady.