«Astana» HQO týraly sheteldik sarapshylar ne deıdi
ASTANA. QazAqparat - Búgin Elbasy N.Nazarbaevtyń qatysýymen ashylǵan «Astana» halyqaralyq qarjy ortalyǵynyń qyzmeti men bolashaǵyna qatysty sheteldik sarapshy mamandar óz oı-pikirlerimen bólisti, dep habarlaıdy QazAqparat tilshisi.
«Astana» HQO tabysty ekonomıka qurýǵa úlken septigin tıgizedi» dep esepteıdi Ulybrıtanııanyń saýda mınıstri Lord Frensıs Mod.
«Men «Astana» HQO ashý ıdeıasyn qoldaımyn. Mundaı qarjy ortalyǵynyń áleýeti óte zor. Jahandyq ekonomıkanyń geografııasy qazir shyǵysqa qaraı oıysýda. Al Qytaımen shektesip jatqan Qazaqstan, qurlyqtyń ishine, orta shyǵys, Reseı aımaǵyna erkin shyǵa alady. Ekonomıkalyq reformalaý baǵytyndaǵy jumystar jalǵasyn tapsa «Astana» HQO tabysty ekonomıka qurýǵa úlken septigin tıgizbek», - deıdi ol.
Sarapshy «Astana» HQO jumysyn damytýǵa qatysty birqatar keńesterimen bólisti.
«Keıde adamdar jańa qarjy ortalyqtaryna senbeı jatady. Alaıda bul jumystardy strategııalyq turǵydan durys júrgizse - mundaı ortalyqtar óte paıdaly. Meniń oıymsha sizderge eń aldymen jekeshelendirý baǵdarlamasyn tıimdi júzege asyrý qajet. Bul - eń sheshýshi jumys», - deıdi Lord Frensıs Mod.
Jańa ashylǵan ortalyq qyzmetine fınlıandııalyq kompanııalar da úlken qyzyǵýshylyqpen qaraıdy.
«Astana» HQO ashylý rásimine qatysqan fınlıandııalyq «Tracegrow» kompanııasynyń bas atqarýshy dırektory Tatý Lıppanen osylaı deıdi.
«Astana - Fınlıandııa úshin áleýetti bıznes hab. Buǵan bizdiń kózimiz jetti. Árıne, qyzyǵýshylyǵymyz óte joǵary. Jalpy Qazaqstanda múmkindikter kóp. Sizderde bilimdi mamandar, jaqsy bıznes júıesi bar. Bul fın kompanııalary úshin óte mańyzdy. Olar Astana arqyly tutas Orta Azııa óńirine shyǵa alady», - deıdi Tatý Lıppanen.
Onyń aıtýynsha «Astana» HQO-nyń óńirlik habqa aınalý múmkindigi óte joǵary.
«Men álemniń iri qalalarynda 7 jyl turdym. Jáne sizderdiń Astanada istegen jumystaryńyz meni qatty tańǵaldyrdy. Bul qala sheteldik ınvestıtsııany barsha Qazaqstanǵa tartý múmkindigin qalyptastyrady», - dep pikir bildirdi Tatý Lıppanen.
Sonymen qatar «Darem» ıslam ekonomıkasy jáne qarjy ortalyǵynyń dırektory Mehmet Asýtaı «Astana» HQO - Qazaqstan ekonomıkasyna ıslam qarjysyn kóptep tartýǵa múmkindik beredi dep esepteıdi.
«Qazaqstan damýshy memleket, oǵan ekonomıkalyq ósim kerek. Qarjy aǵyny asa qajet. «Astana» HQO - sol qarjyny elge tarta alatyn ortalyqqa aınalady», - deıdi Mehmet Asýtaı .
Onyń aıtýynsha, búgingi tańda ıslam qarjysyna degen suranys álemde óte joǵary. Al Astana óz óńirinde mańyzdy ortalyq. Sondyqtan Qazaqstan úshin ıslamdyq qarjynyń óńirlik habyna aınalý - bul óte mańyzdy saıası sheshim.
«Endigi másele sizderge bıznes mektepterdi jáne qarjy salasyndaǵy zertteýlerdi damytý qajet. Óıtkeni Qazaqstan - jas memleket. Halqy da jas. Olar qarjylyq turǵyda asa belsendi emes», - deıdi Mehmet Asýtaı.
Qarjy ortalyǵyna qatysty AQSh-tyń Qazaqstandaǵy Tótenshe jáne Ókiletti elshisi Djordj Krolda óz pikirimen bólisti.
«Meniń oıymsha «Astana» HQO bolashaǵy jarqyn. Óńirde buryn-sońdy mundaı qurylym bolmaǵan. Qazaqstandyq qarjy ortalyǵynda jumys júıesi jaqsy jolǵa qoıylǵan. Sot, bırja salasyndaǵy eń ozyq oılar tartylǵan. AQSh-tyń NASDAQ bırjasy «Astana» HQO birlesip jumys isteýi biz úshin úlken maqtanysh», - dedi amerıkan elshisi.
Onyń aıtýynsha, «Astana» HQO TMD, Eýrazııalyq ekonomıkalyq odaq aıasynda asa aýqymdy qarjylyq uıymǵa aınalmaq.
«Amerıkandyq bıznesmender «Astana» HQO týraly kóbirek bilgileri keledi. Tipti bizdiń elshilikte jańa qarjy ortalyǵyna qyzyǵýshylyq tanytqandar bar. Sondaı-aq AQSh saýda palatasynyń ókilderi «Astana» HQO aıasynda jumys isteýge nıetti», - deıdi Djordj Krol.
Bul rette ol qarjy naryǵyndaǵy básekelestik óte joǵary ekenin aıta kele, qazaqstandyq ortalyq óz qyzmetin jarnamalaý máselesine basa mán berý kerektigin eskertti.
