«Astana» HQO resmı tanystyrylymǵa daıyndyǵy qandaı
ASTANA. QazAqparat - «Astana» halyqaralyq qarjy ortalyǵynyń organdary depýtattardyń suraqtaryna jaýap berdi, dep habarlaıdy QazAqparat.
«Astana» halyqaralyq qarjy ortalyǵynyń (budan ári - AHQO) damýy máseleleri jóninde AHQO Basqarýshysy Qaırat Kelimbetovtiń, QR Parlamenti Májilisi depýtattarynyń qatysýymen kóshpeli jınalys ótti. Otyrys barysynda Q. Kelimbetov depýtattardy AHQO-nyń qyzmetimen tanystyryp, olarǵa Ortalyqtyń qalyptasýy men keleshegi týraly aıtyp berdi», - dep atap ótilgen taratylǵan málimette.
Aıta keteıik, AHQO-nyń organdary resmı túrde 2018 jyldyń 1 qańtarynan bastap iske qosyldy. AHQO janynan Qarjylyq qyzmetter kórsetýdi retteý jónindegi komıtet, AHQO-nyń táýelsiz soty, Halyqaralyq tórelik ortalyǵy, AHQO bırjasy, Expat Centre óz jumystaryn bastady. AHQO qyzmetiniń negizgi baǵyttary kapıtal naryǵy, aktıvterdi basqarý, jeke tulǵalardyń dáýletin basqarý, ıslamdyq qarjy, jańa qarjy tehnologııalary bolyp tabylady.
«AHQO Basqarýshysy depýtattardy 2018 jyly 5 shilde kúni AHQO-nyń halyqaralyq tusaýkeseri aıasynda josparlanǵan is-sharalar týraly habardar etti. «Suraq-jaýap» sessııasy kezinde depýtattardyń qoıylǵan suraqtaryna tolyq aqparat berildi», - delingen ortalyq habarlamasynda.
Esterińizge sala keteıik, «Astana» halyqaralyq qarjy ortalyǵynyń halyqaralyq tanystyrylymy 2018 jyldyń 5 shildesinde ótedi.
