«Astana» HQO-nyń damý bolashaǵy qandaı - Halyqaralyq valıýta qorynyń boljamy
ASTANA. QazAqparat - Halyqaralyq valıýta qorynyń Qazaqstandaǵy mıssııasynyń jetekshisi Mark Horton "Astana" Halyqaralyq qarjy ortalyǵynyń damýyna qatysty pikir bildirdi, dep xabarlaıdy QazAqparat tilshisi.
"Bizdińshe, "Astana" Halyqaralyq qarjy ortalyǵynyń damý bolashaǵy zor. Ony qarjy qyzmetteri boıynsha aımaqtyq xabqa aınaldyrýǵa bolady. Biraq oǵan ýaqyt qajet. Sebebi ol qyzmetterge suranys bolýy tıis. Árıne, "Astana" Halyqaralyq qarjy ortalyǵy aldymen ózin myqty ınstıtýt retinde kórsete bilýi kerek. Kórsetip qana qoımaı, sondaı ınstıtýt bolyp qalyptasýy qajet", - dedi M.Horton Astanada ótken baspasóz máslıxatynda.
Sarapshynyń aıtýynsha, Ortalyq Azııaǵa ondaı ortalyq qajet. Sonyń arqasynda sheteldik ınvestıtsııalardy kóptep tartýǵa bolady. Degenmen, birqatar qaýip-qaterler bar.
"Máselen, Qazaqstandaǵy bankterdi tıimdi basqarý jáne jalpy qarjy júıesiniń ashyqtyǵyn kórsetý kerek. Atalǵan másele "Astana" HQO damýyna óz áserin tıgizedi. Sosyn bul aımaqta geosaıası qaýip-qaterler de bar. Negizi, "Astana" qarjy ortalyǵynda myqty quqyqtyq bazany jasaqtap alǵany durys boldy. Dırektorlar keńesine, baqylaý keńesine xalyqaralyq sarapshylardy shaqyrdy. Ol da durys. Birinshi tranzaktsııalar jazda ótýi ábden múmkin. Qarjy mınıstrligi óz eýrobondttaryn teńgemen shyǵarady deıdi. Ony da qarjy ortalyǵy arqyly ótkizedi. "Samuryq-Qazyna" qorynyń kompanııalary satylymǵa shyǵarylady. Bári durys. Biraq asyǵystyq jasamaý qajet. Sebebi Dýbaı, Sıngapýr, Gonkong sııaqty qarjy ortalyqtaryn damytýǵa eki-úsh aı emes, 20 jyl ketti", - dep atap kórsetti M.Horton.
Aıta keteıik, búgin Halyqaralyq valıýta qory Qazaqstan ekonomıkasyna óz baǵasyn berdi.
