«Astana» HQO men Seedstars ózara túsinistik týraly memorandýmǵa qol qoıdy
Bul týraly «Astana» halyqaralyq qarjy ortalyǵynyń baspasóz qyzmeti habarlady.
Baspasóz qyzmetiniń málimetterine qaraǵanda, qujatqa sáıkes AHQO men Seedstars arasyndaǵy yntymaqtastyq startaptardy qoldaý baǵdarlamalaryn iske asyrý men startap ekojúıesin damytýdy, sonymen qatar halyqaralyq sarapshylardy Ortalyq Azııa aımaǵyna tartýdy qamtıtyn bolady.
«Biz ınvestıtsııalyq jáne ınnovatsııalyq áleýetti damytýmen aınalysatyn iri halyqaralyq kompanııalardyń biri Seedstars-pen yntymaqtastyq ornatqanymyzǵa qýanyshtymyz. AHQO jyl saıyn óńirlik qoldaý baǵdarlamalaryn ótkizip, startaptarǵa erekshe kóńil bólip keledi. Bul yntymaqtastyq Qazaqstan men Ortalyq Azııanyń startaptaryna ınvestıtsııa tartýǵa jáne tehnologııalyq jobalar salasynda kásipkerlerdiń jańa býynyn damytýǵa tyń serpin beredi», - dep atap ótti AHQO basqarýshysy Qaırat Kelimbetov.
«AHQO Qazaqstandaǵy Seedstars-tyń senimdi seriktesi. Sonymen qatar biz yntymaqtastyqtyń jańa múmkindikterin talqylaýǵa nıettimiz. Sebebi bizde sátti júzge asqan yntymaqtastyqtyń tájirıbesi bar. Soǵan súıene otyryp qazaqstandyq kásipkerlerge bilim berý baǵdarlamalarymyz ben qarjylyq qoldaýymyzdyń arqasynda uzaq merzimge yqpal etemiz degen úmittemiz. Sebebi bizdiń negizgi maqsatymyz jergilikti ekojúıeni qoldaý men aımaqtyq ári halyqaralyq ınvestorlardy Qazaqstanǵa tartý úshin qolaıly jaǵdaı jasaý» - dep atap ótti Per-Alan Masson, Seedstars birlesken quryltaıshy.
2019 jyldyń qarasha aıynda Qazaqstannyń astanasy Nur-Sultan qalasynda AHQO-nyń Fınteh habymen áriptestikte Ortalyq-Shyǵys Eýropa men Ortalyq Azııadaǵy Seedstars óńirlik sammıti ótti. Sondaı-aq 2018 jyly AHQO-nyń bastamasymen Seedstars Qazaqstanda FintechStars halyqaralyq akseleratsııalyq baǵdarlamasyn ótkizdi.
