Astana HQO krıptoaktıvti damytý boıynsha EXANTE-men yntymaqtaspaq
ASTANA. QazAqparat - «Astana» halyqaralyq qarjy ortalyǵy men EXANTE halyqaralyq ınvestıtsııalyq kompanııasy Qazaqstandaǵy krıptoaktıvter naryǵyn damytýǵa jáne AHQO-ny tehnologııalardyń halyqaralyq saraptama ortalyǵy retinde alǵa jyljytý boıynsha yntymaqtasatyn bolady. Búgin osy maqsatta taraptar memorandýmǵa qol qoıdy, dep habarlaıdy QazAqparat.
Ortalyqtyń baspasóz qyzmetinen habarlaǵanyndaı, tabysty blokcheın-jobalarǵa ıe EXANTE kompanııasy krıptoaktıvter naryǵyn retteý máseleleri, fınteh-ekojúıesin damytýǵa qoldaý kórsetý úshin AHQO-nyń aktilerin daıyndaýǵa belsene qatysýǵa nıet bildirgen.
Taraptar qarjy retteýishteriniń fınteh-kompanııalaryn damytý úshin qolaıly jaǵdaılardy jasaýda belsendi jumys isteıtinin de aıtty. Bundaı baılanystardyń arqasynda «Astana» halyqaralyq qarjy ortalyǵy ǵalamdyq ınnovatsııalyq qarjy habtarynyń birine aınalýǵa umtylady.
Blokcheın tehnologııalaryna birqatatar elderdiń úkimetteri jiti nazar aýdaryp otyr. Qazaqstan óz kezeginde osy saladaǵy jahandyq kóshbasshy bolý jolynda naqty qadamdar jasaıtyn bolady. Tsıfrlyq aktıvter naryǵynyń damýy jónindegi optımıstik boljamymen EXANTE Basqarýshy seriktesi Grıgorıı Klýmov bólisken bolatyn.
«Blokcheın tehnologııa óziniń birneshe artyqshylyǵymen belgili. Olar: ashyqtyq, berilgen aqparattardyń ózgermeýi, jyldam tranzaktsııalar jáne olardy óńdeýdiń qymbat emestigi. Naryqtyń tez damýyna tek osy artyqshylyqtardyń ózi jetkilikti. Ǵalamdyq aqsha massasynyń kórsetkishi (M2) jyl saıyn 6% artyp, qazirdiń ózinde 50 trln dollardy qurap otyr (Qytaıdy aıtpaǵanda). Bizdiń esepteýimiz boıynsha, tsıfrlyq aktıvter naryǵy ár eki jyl saıyn artý áleýetine ıe. Bizdiń negizgi maqsatymyz - ortalyqtandyrylmaǵan qarjy júıesi men qoǵamnyń arasyn baılanystyratyn tetikke aınalý»,-dedi G. Klýmov.
