«Astana» HQO qatysýshylary qandaı valıýta paıdalanady

Úkimet basshysynyń aıtýynsha, AHQO-nyń táýelsiz quzyreti bolady. Dúnıejúziniń barlyq qarjy ortalyqtaryndaǵy sııaqty quqyq jáne sot júıesi aǵylshyndyq jalpy quqyq prıntsıpterin ustanady. 

«Arbıtraj ortalyǵy, Halyqaralyq qarjy soty jáne táýelsiz qarjylyq retteýshi retinde Qarjy qyzmetterin retteý jónindegi komıtet quryldy. Atalǵan barlyq qurylymdardy álemge tanymal tájirıbeli zańgerler basqarady. Qurmetti ser Výlf jáne qurmetti sot músheleri, Djadj hanym, Doman hanym, men sizderge Qazaqstan Respýblıkasynyń shaqyrýyn qabyl alǵandaryńyz úshin jáne sizder shyn máninde álemdik qarjy júıesiniń jańa elementi retinde Astana halyqaralyq qarjy ortalyǵynyń negizin salýshylardyń biri bolǵandaryńyz úshin shyn júrekten alǵys aıtamyn», - dedi Baqytjan Saǵyntaev.

Onyń atap ótýinshe, AHQO organdary men qatysýshylary, sondaı-aq olardyń qyzmetkerleri salyq tólemderinen 50 jylǵa bosatylady. Olar - qarjylyq jáne qosymsha qyzmetterden túsetin kiristerge korporatıvti tabys salyǵy, jeke tabys salyǵy, jer salyǵy jáne múlik salyǵy.

«AHQO qatysýshylary AHQO bırjasynyń kelisimsharttary men erejelerinde qarastyrylǵan kez kelgen valıýtany paıdalana alady.  65 eldiń azamattary, onyń ishinde EYDU barlyq elderi úshin vızasyz kelý engizildi.  AHQO Organdarynyń qyzmetkerleri men qatysýshylary jáne olardyń otbasylarynyń músheleri úshin 5 jylǵa deıin merzimge arnaıy vızalyq rejım qarastyryldy. Kóliktik qoljetimdiligi keńeıtildi. Búginde Astana tikeleı áýe qatynasy arqyly álemniń 9 qarjy ortalyǵymen baılanysady. Aldaǵy bir, bir jarym jyl ishinde kezeń-kezeńmen jańa halyqaralyq reıster ashylatyn bolady: Sıngapýr, Tokıo, Nıý-Ĭork jáne taǵy basqalary. Osylaısha, qazirgi tańda Halyqaralyq qarjy ortalyǵynyń biregeı jumys mehanızmi quryldy», - dedi ol.