«Astana» HQO Jumore elektrondyq saýda alańymen yntymaqtastyqty nyǵaıtpaq
BEIJІŃ. QazAqparat - Búgin «Astana» halyqaralyq qarjy ortalyǵy (AHQO) men «Zhejiang «Jumore» E-commerce Co. Ltd» kompanııasy arasynda ózara túsinistik týraly memorandýmǵa qol qoıyldy, dep habarlaıdy «QazAqparat» HAA-nyń Qytaıdaǵy menshikti tilshisi.
Taraptar «Jibek jolynyń ekonomıkalyq beldeýi» bastamasy aıasynda iske asyrylatyn jobalarǵa tikeleı ınvestıtsııalar tartý jáne qor naryǵyn damytý boıynsha bir-birine qoldaý kórsetýge ýaǵdalasty.
«Astana» qarjy ortalyǵy basshysy Qaırat Kelimbetovtiń sózine qaraǵanda, AHQO úshin álemniń 130 elimen áriptestik qarym-qatynas ornatqan «Jumore» tájirıbesi asa mańyzdy.
«Astana» HQO Jumore elektrondy saýda alańymen yntymaqtasýǵa daıyn.
«Qazaqstandyq jobalardy «Jumore» elektrondyq kommertsııa alańyna qosý, sondaı-aq atalǵan kompanııanyń tájirıbesi men tehnologııalyq resýrstary «Astana» HQO qarjy haby retinde damýyna qosymsha serpin beredi», - dep atap ótti Q. Kelimbetov.
Eske sala keteıik, 2015 jylǵy jeltoqsanda Qazaqstan Respýblıkasynyń Prezıdenti Nursultan Nazarbaev «Astana» halyqaralyq qarjy ortalyǵyn qurý týraly zańǵa qol qoıdy. AHQO-nyń maqsaty qarjylyq qyzmetterdi kórsetetin halyqaralyq deńgeıdegi jetekshi ortalyq qalyptastyrý bolyp tabylady.
