«Astana» HQO halyqaralyq qarjy ortalyqtarynyń eksklıýzıvti birlestigine endi
ASTANA. QazAqparat - AHQO halyqaralyq qarjy ortalyqtarynyń eksklıýzıvti birlestigi - Vantage Financial Centres (VFC) quramyna endi. Bul týraly Mılan qalasynda ótken Ǵalamdyq Qarjy ortalyqtary Indeksiniń (Global Financial Centers Index (GFCI) 21-shyǵarylymynyń resmı tusaýkeri kezinde málim boldy.
Vantage Financial Centres quramyna Tokıo, Toronto, Shanhaı, Beıjiń, Ábý-Dabı sekildi belgili halyqaralyq qarjy uıymdary kiredi.
«VFC birlestiginiń ókilderi konsýltatıvtik qoldaý, ózge múshelerdiń tarapynan GFCI reıtıngi qurylymdalatyn negizgi kórsetkishter boıynsha baǵalaný múmkindigine ıe bolady. Budan basqa Ortalyqtar ǵalamdyq qarjy ortalyqtarymen qatar joǵary dárejedegi halyqaralyq is-sharalarǵa belsendi túrde qatysa alady.
Bul is-sharalardy qarjy ortalyqtarynyń básekege qabilettiligin artyrý úshin sarapshylardyń pikirlerimen bólisý, tájirbıe almasatyn ózindik alańy dep ataýǵa bolady.
Bul artyqshylyqtar, sózsiz, AHQO-ǵa álemdik qaýymdastyq tarapynan seniminiń artýyna, jaǵymdy ımıdjin qalyptastyrýǵa áser etedi. Bul birlestik quramyna ený - AHQO-nyń qalyptasyp, damýyna baılanysty der kezinde jasalynǵan qadam», delingen «Astana» halyqaralyq qarjy ortalyǵy taratqan baspasóz baıanynda.
Aıta keteıik, álemdik qarjy ortalyqtarynyń básekege qabilettiligin anyqtaıtyn GFCI Indeksi2007 jyldan beri jarııalanady. Reıtıng qarjy ortalyqtarynyń 29 000 baǵamy, onlaın-saýalnama jáne Búkilálemdik bank, Ekonomıkalyq yntymaqtastyq jáne damý uıymy (EYDU) jáne taǵy da basqa uıymdardyń 100-den astam kórsetkishterin qaperge alady. GFCI ındeksi «isker orta», «qarjy sektorynyń damýy», «ınfraqurylym faktorlary», «adam kapıtaly», «bedel jáne jalpy faktorlar» sekildi kórsetkishterden quralady.
AHQO - aımaqta erekshe jaǵdaılar usynatyn qarjy ortalyǵy. Olar: aǵylshyn quqyǵy prıntsıpterine negizdelgen arnaıy quqyqtyq rejım, halyqaralyq talaptarǵa sáıkes táýelsiz qarjylyq retteý, 50 jylǵa arnalǵan salyqtyq jeńildikter, jeńildetilgen vızalyq jáne eńbek rejımi, AHQO aımaǵyndaǵy resmı tildiń aǵylshyn tili bolýy. EKSPO-2017 ınfraqurylymy bazasynda ornalasatyn AHQO 2018 jyldan tolyqtaı jumys istep bastaıdy.
