«Astana» HQO der kezinde ashylǵaly otyr - Ulybrıtanııanyń saýda jáne ınvestıtsııa eks-mınıstri
«Rasynda da, qarjy ortalyqtarynyń qarqyndy túrde damyp kele jatqanyna kýámiz. Máselen, ótken ǵasyrdyń sekseninshi jyldary men Margaret Tetcherdiń úkimetinde mınıstr bolyp, qarjy ortalyǵy ornalasqan Londonda qarjylyq naryqtardyń rettelýine jaýapty boldym. Sol kezdiń ózinde men adamdarǵa Londonnyń dál qazir iri qarjy ortalyǵy ekenin aıtqanymmen, biraq ol kezde HQO-ǵa mundaı quqyq berilmeıtin. Qazirgi tańda álemniń túkpir-túkpirinde mundaı qarjy ortalyqtary kúnnen kúnge artyp keledi. Naryq jáne qarjylyq qyzmetterge suranys mol. Jahandyq deńgeıde onyń keleshegi de áleýetti. Sondyqtan, tıimdi halyqaralyq qarjy ortalyqtarynyń qajettiligi basym», - deıdi ol.
Frensıs Modtyń aıtýynsha, álem memleketteri ınvestorlar úshin barynsha jaǵdaı jasap jatyr.
«Investorlar ne izdeıdi? Olar tabys túsiretin kompanııalarǵa áýes. Olar aqshalaryn tabysy mol salaǵa jumsaǵysy keledi. Olar sonymen birge, qaýipsizdik jaǵyna basa mańyz beredi. Bul degenińiz - zańnyń ústemdigi. Investorlar eń aldymen óz quqyqtarynyń buzylmaýyna mán beredi. Qaýipsiz ortany qalyptastyra biletin retteýshi júıeni izdeıdi. Bıýrokratııaǵa urynǵysy kelmeıdi. Sondyqtan, meniń oıymsha, «Astana» Halyqaralyq qarjy ortalyǵynyń damýy - oılastyrylǵan, strategııalyq qadam bolyp tabylady», - dedi ol.
Frensıs Mod óz sózinde Qaırat Kelimbetov aıtqandaı, ekonomıkalyq gravıtatsııa Azııaǵa aýysyp bara jatqanyna qosyldy.
«Álbette, Dýbaıda, Sıngapýrda, Londonda qarjy ortalyqtary bar. Biraq, osy aımaqta mundaı qarjy ortalyǵy birinshi ret ashylǵaly otyr. Bul aımaqta óte kóp múmkindikter bar bolǵandyqtan, Ortalyq Azııa tez damıtyn aımaqqa aınala alady. Astanada aǵylshyn quqyǵyn ustanyp otyrǵanyńyz - óte paıymdy qadam boldy dep esepteımin. Sondyqtan, Astananyń geografııalyq ornalasýy men qarjy ortalyǵynyń týra ashylý ýaqyty - bári de sátti kelip tur», - dedi ol.
