Astana - Helsınkı áýe reısi qaıta jandandy
ASTANA. QazAqparat - Finnair áýe kompanııasy Astanaǵa áýe baǵytyn qaıta jandandyrdy. «Nursultan Nazarbaev halyqaralyq áýejaıy» AQ baspasóz qyzmetiniń habarlaýynsha, ushý baǵyttary bıylǵy jylǵy shildeden qyrkúıek aıyna deıin aptasyna eki ret sársenbi jáne juma kúnderi yńǵaıly Airbus 319 ushaǵy arqyly júzege asyrylady. Ushý ýaqyty tórt saǵat.
Esterińizge sala keteıik, 2017 jylǵy jazǵy aılarda Finnair áýe kompanııasy úsh myńnan asa jolaýshyǵa qyzmet kórsetti.
Atalǵan baǵytty qaıta jańartý qazaqstandyq jolaýshylarǵa Santa Klaýstyń otanyn kórýge, ári olardyń jaıly áýe kemesimen Helsınkı -Vantaa áýejaıy arqyly Eýropanyń 70 ten asa jáne Azııanyń 19 qalasyna saıahat jasaýyna múmkindik berse, fınlıandııalyq saıahatshylar elimizdiń kórikti jerlerin aralaıtyn bolady.
Finnair - Fınlıandııadaǵy ulttyq áýe tasymaldaýshy, ári eldegi eń iri áýe kompanııasy. Onyń ornalasqan jeri Helsınkı-Vantaa áýejaıy. Oneworld alıansynyń quramynda. Kompanııanyń negizgi aktsıoneri Fınlıandııa úkimeti.
