«Astana hanymy» baıqaýynda telejúrgizýshi Gúlnaz Álimgereı jeńiske jetti
STANA. Tamyzdyń 27-si. QazAqparat /Jasulan Amanbaıuly/ - Keshe keshke Rıksos qonaqúıinde ótken «Astana hanymy» baıqaýynda telejúrgizýshi Gúlnaz Álimgereı jeńiske jetti, dep habarlaıdy QazAqparat.
Barlyǵy bul baıqaýǵa 15 kelinshek qatysty. Olardyń ishinde eń jas qatysýshy - 25-te, eń eresegi 39 jasta.
Baıqaý uıymdastyrýshylary - Qazaqstan Respýblıkasy Prezıdentiniń janyndaǵy Otbasy jáne áıelder isi jónindegi ulttyq komıssııasy jáne «Sezon» shyǵarmashylyq birlestigi qatysýshylarǵa birneshe týr daıyndady. Birinshi Astana hanymy synynda tanystyrý kezeńinen barlyǵy súrinbeı ótti. Degenmen kelinshekterdiń júzinen qobaljý baıqaldy.
Bárinen buryn qatysýshylarǵa «Intellektýaldy týrda» qıynǵa soqty. Onda qazaqtyń salt-dástúri men tarıhyna qatysty bir-bir suraqtan qoıyldy. Bul týrda joly bolmaǵandar kelesi «Kýlınarly saıysta» ese qaıtarýlaryna múmkindik ashyldy. Ol týrda berilgen belgili bir azyq-túlikten 15 mınýt ishinde taǵam daıyndaý kerek boldy.
Kelesi saıystarda kelinshekter óz balalaryna, kúıeýine kóńil men kútim kórsete bilýi jáne onyń ónerge degen beıimi synaldy.
Sonymen «Astana hanymy» baıqaýynda jeńiske jetken 3 qatysýshynyń attary atalatyn da sát jetti. Prokýratýra organdarynda qyzmet isteıtin Márııam Oskar ekinshi vıtse-hanym atandy. Birinshi vıtse-hanym telejúrgizýshi, 7-shi arnanyń dıktory Sandýǵash Sultanovanyń esimi ataldy. «Astana hanymy» «Qazaqstan» arnasynyń telejúrgizýshisi Gúlnaz Álimgereı dep tanyldy.
Endi olar tamyzdyń 16-sy kúni Almatyda «Qazaqstan hanymy» baıqaýynda elorda atynan synǵa túsedi. Al ol jerde jeńiske jetken kelinshek Seýlde ótetin «Álem hanymy» baıqaýyna attanady.
