«Astana» halyqaralyq qarjy ortalyǵynyń quqyqtyq konferentsııasy ótti
ASTANA. QazAqparat - «Astana» halyqaralyq qarjy ortalyǵynyń (AHQO) uıymdastyrýymen quqyqtyq konferentsııa ótti. Іs-shara barysynda AHQO sot organdarynyń jumysy, sondaı-aq AHQO Soty men Halyqaralyq tórelik ortalyǵy (budan ári - HTO) usynatyn qyzmetter tanystyryldy.
Konferentsııaǵa AHQO Basqarýshysy Qaırat Kelimbetov, AHQO Sotynyń tirkeýshisi jáne atqarýshy dırektory Krıstofer Kempbell-Holt, AHQO sýdıalary ser Rýpert Djekson men Endrıý Spınk, AHQO-nyń Quqyqtyq konsýltatsııalyq keńesiniń múshesi Endrıý Oldland, sondaı-aq otandyq jáne halyqaralyq zań kompanııalarynyń ókilderi qatysty.
«AHQO quqyqtyq konferentsııasy - bul sot jáne zańnama salasyndaǵy qazirgi tańdaǵy máseleler men sońǵy úrdisterdi talqylaıtyn ashyq alań. Quqyqtyq qoǵamdastyqtyń ókilderi AHQO-nyń aǵylshyn jalpy quqyǵynyń qaǵıdattaryna, zańnamasy men pretsedentterine jáne de álemniń jetekshi qarjy ortalyqtarynyń standarttaryna negizdelgen arnaıy ıýrısdıktsııa týraly mol málimet alý múmkindigine ıe boldy», - dedi Q. Kelimbetov.
«AHQO Soty kommertsııalyq daýlardy sheshýdiń eń joǵarǵy halyqaralyq standarttary boıynsha áreket etedi. Halyqaralyq tórelik ortalyǵy tórelikti, medıatsııany men sottyq talqylaýlardyń basqa da balamalaryn qamtamasyz etedi. HTO-nyń týyndaıtyn daýlardy sheshý úshin taraptarǵa erejeler men rásimderdiń barynsha tańdaýy men ıkemdiligin usyna alatyn kórnekti tóreshiler men medıatorlardan qurylǵan halyqaralyq toby bar», - dedi K. Kempbell-Holt.
Konferentsııa barysynda Sot, Halyqaralyq tórelik ortalyǵy jáne AHQO-nyń quqyqtyq bazasy jónindegi máseleler boıynsha sessııalar ótkizildi. Zań qaýymdastyǵynyń ókilderi AHQO jumysyna úlken qyzyǵýshylyq tanytty. AHQO spıkerleri konferentsııa qatysýshylarynyń barlyq suraqtaryna tolyqtaı jaýap berdi.
