«Astana» halyqaralyq qarjy ortalyǵy janynan Quqyqtyq konsýltatsııalyq keńes quryldy
ASTANA. QazAqparat - Londonda «Astana» halyqaralyq qarjy ortalyǵynyń (AHQO) janynan qurylǵan Quqyqtyq konsýltatsııalyq keńestiń birinshi otyrysy ótti.
Sharanyń ashylý sózin «Astana» halyqaralyq qarjy ortalyǵy basqarýshysy Qaırat Kelimbetov, QR-dyń Ulybrıtanııa men Soltústik Irlandııadaǵy Elshisi Erlan Ydyrysov jáne Anglııa men Ýelstiń eks Bas Joǵarǵy Sýdıasy Lord Garrı Kennet Výlf aldy. Jınalysqa atalǵan keńestiń quramyna kiretin Ulybrıtanııanyń bedeldi zań fırmalary qatysty.
Keńes mindetine qarjy ortalyǵynyń jobalaryndaǵy aktilerdi qaraý jáne saraptaý, sondaı-aq, ózge de keńes berý qyzmetteri jatady. Sonymen qatar, Keńes quziretine Anglııa men Ýelstiń quqyqtyq qaǵıdalaryn negizge ala otyryp, quqyqtyq bazany qalyptastyrý jáne de álemdegi jetekshi qarjy ortalyqtarynyń standarttarymen jumys isteý de kiredi.
Astana halyqaralyq qarjy ortalyǵynyń basqarýshysy Qaırat Kelimbetovtiń sózinshe, Anglııa men Ýelstiń quqyqtyq quzireti júretin elderde tájirıbesi bar sarapshylar quramyna kirip otyrǵan Keńes bolashaqta qarjy ortalyǵynyń aktilerin ázirleý men onyń qyzmetine kóp kómegin tıgizbek.
Ol sondaı-aq, Quqyqtyq Konsýltatsııalyq Keńestiń jumysyna Baker McKenzie, Devonshires, Hogan Lovells, Michelmores, Norton Rose Fulbright, jáne White&Case sekildi álemniń beldi kompanııalary da tartylyp otyrǵanyn málimdedi.
Aıta keteıik, 2015 jylǵy jeltoqsan aıynda Qazaqstan Respýblıkasynyń Prezıdenti Nursultan Nazarbaev «Astana» halyqaralyq qarjy ortalyǵyn qurý týraly Konstıtýtsııalyq zańǵa qol qoıdy. AHQO-nyń maqsaty qarjylyq qyzmetterdi kórsetetin halyqaralyq deńgeıdegi jetekshi ortalyq qalyptastyrý bolyp tabylady. Postkeńestik keńistikte tuńǵysh ret aǵylshyn quqyǵynyń qaǵıdattary engiziledi, qarjy ortalyǵynyń resmı tili - aǵylshyn tili bolady.
AHQO-nyń mindetteri qarjylyq qyzmetter salasyn ınvestıtsııalaý úshin tartymdy orta qurý arqyly el ekonomıkasyna ınvestıtsııalar tartýǵa járdemdesý, Qazaqstan Respýblıkasynyń baǵaly qaǵazdar naryǵyn damytý, onyń halyqaralyq kapıtal naryqtarymen yqpaldasýyn qamtamasyz etý bolyp tabylady. AHQO sondaı-aq elimizde saqtandyrý, bank qyzmetteri men ıslamdyq qarjylandyrý naryǵyn damytýǵa nıettenedi.
Lord Garrı Kennet Výlf - Ulybrıtanııa Lordtar Palatasy adam quqyqy jónindegi Birikken komıtetiniń múshesi, quqyq ulyqtyǵy jónindegi Búkilpartııalyq Parlamenttiń top Tóraǵasynyń orynbasary. Lord Výlf Anglııa jáne Ýelstiń Joǵarǵy soty, Katar qarjy ortalyǵy kommertsııalyq jáne azamattyq sotynyń Prezıdenti, Blackstone Chambers arbıtri jáne medıatory qyzmetterin atqarǵan.
