Astana halyqaralyq forýmyn ótkizýge 1,4 mlrd teńge jumsalady

ASTANA. QazAqparat – Astana halyqaralyq forýmyn uıymdastyryp, ótkizý úshin «QazExpoCongress» UK» aktsıonerlik qoǵamyna 1,4 mlrd teńgeden astam (1 440 619 000) nysanaly transfert jasalady, dep habarlaıdy QazAqparat tilshisi.

Bul týraly Ulttyq ekonomıka mınıstrliginiń 2023-2025 jyldarǵa arnalǵan bıýdjeti týraly anyqtamada aıtylǵan.

Aldaǵy úsh jylda mınıstrlik strategııalyq baǵyttan tys shyǵystarǵa 11,6 mlrd teńge jumsamaqshy.

Mınıstrliktiń ortalyq apparaty men komıtetterin, aýmaqtyq bólimshelerdi ustaýǵa 7,6 mlrd teńge qarastyrylǵan.

Sondaı-aq, 9 taqyryp boıynsha taldamalyq zertteýler júrgizýge 1,6 mlrd teńge, bıýdjettik ınvestıtsııalyq jobalardy baǵalap, memlekettik-jekemenshik áriptestik jáne kontsessııa qujattamasyna saraptama júrgizýge 631,9 mln teńge kózdelgen.

Al Astana halyqaralyq forýmyn uıymdastyrýǵa 2023 jyly «QazExpoCongress» UK» AQ-ǵa 1,4 mlrd teńgeden astam (1 440 619 000) nysanaly aýdarym jasaý josparlanyp otyr.