Astana halyqaralyq áýejaıynda eki mıllıonynshy jolaýshyǵa qyzmet kórsetildi
ASTANA. 30 qarasha. QazAqparat - Búgin Astana halyqaralyq áýejaıy aldyn ala boljanǵan jolaýshylar sanynan asyra otyra, óziniń eki mıllıonynshy jolaýshysyna qyzmet kórsetti. Eki mıllıonynshy jolaýshy Almaty qalasynan Evgenıı Jýravlev bolyp shyqty.
Ol jóninde Almaty-Astana baǵyty boıynsha KS 851 reıs kelgen kezde habarlandy. Astanaǵa ushyp kelgen eki mıllıonynshy jolaýshyny «Astana halyqaralyq áýejaıy» AQ ókilderi gúlmen, syılyqtarmen qarsy aldy. Elorda áýejaıynyń birinshi vıtse-prezıdenti R. Ádımolda oǵan saltanatty túrde úı kınoteatry bar plazmaly teledıdardy tabys etti. Budan basqa, «Eır Astana» AQ áýe kompanııasynyń Astana qalasyndaǵy ókili G.Sátbaeva ulttyq áýe tasymaldaýshy ushatyn Beıjiń qalasy baǵyty boıynsha baryp-qaıtýǵa eki áýebıletti syıǵa tartty.
«Tuńǵysh ret jyldyq jolaýshylar aǵyny eki mıllıon jolaýshydan asyp otyr. Aldymen, mundaı rekordtyq kórsetkishke baǵyttyq toraptardy damytý boıynsha áýekompanııalarmen seriktestik nátıjesinde, sondaı-aq áýejaı usynatyn qyzmettiń sapasyn únemi jetildirýdiń, iskerlik belsendiliktiń jáne elordada týrızminiń damýy arqasynda qol jetkizilip otyr»,-dedi elorda áýejaıynyń birinshi vıtse-prezıdenti.
