Astana halyqaralyq áýejaıynda bıznes-avıatsııanyń jańa termınaly ashyldy (FOTO)
Astananyń álemdik deńgeıdegi zamanaýı megapolıs retinde oıdaǵydaı damýy úshin halyqaralyq áýejaıdaǵy jańa nysannyń mańyzy atap ótildi. Astana eldiń ekonomıkalyq ortalyǵy retinde damyp, ınvestıtsııalyq tartymdylyǵy artqan saıyn qalaǵa alys-jaqyn shetelderden keletin isker toptardyń sany da turaqty túrde ósip keledi. Aldaǵy EKSPO-2017 halyqaralyq mamandandyrylǵan kórmeniń ótýine, keıinnen Halyqaralyq qarjy ortalyǵynyń qurylýyna baılanysty jańa bıznes-avıatsııa termınalynyń ózektiligi arta túspek.
Bul týraly astana.gov.kz jazady.
Áýejaıdy keńeıtý, jańa termınaldar salý, ınjenerlik jáne servıstik ınfraqurylymdy jaqsartý elordanyń halyqaralyq mańyzy bar ortalyq kólik-logıstıkalyq hab retinde qalyptasýyna eleýli úles qosady.
Úsh myń sharshy metrge jýyq alańda ornalasqan jańa termınal saǵatyna 200 jolaýshyny ótkize alady. Termınal ǵımaratynda konferents-zal, kelissózder ótkizýge arnalǵan bólmeler, sondaı-aq, 30 oryndyq kólik turaǵy bar. Bıznes-avıatsııa termınalynda charterlik reısterge qyzmet kórsetiledi. Áýejaı basshylyǵynyń aıtýynsha, bul nysandy iske qosý jolaýshylarǵa arnalǵan qyzmet kórsetý sapasyn aıtarlyqtaı arttyryp, bıznes-avıatsııa reısteriniń tartymdylyǵyn ulǵaıtady.
Sonymen birge, qazirgi kezde jańa termınaldyń qurylysy men Astana qalasy áýejaıynyń ushý-qoný alańyn jóndeý jumystary júrip jatyr. Jańa termınal jylyna tórt mıllıon jolaýshyny ótkize alady. Osylaısha Astana áýejaıy 2017 jyly jolaýshylar sanyn jylyna úsh mıllıonnan jeti mıllıonǵa deıin kóbeıtpek.
Búgingi tańda áýejaı alys-jaqyn shetelderge shyǵatyn jolaýshylar reısterin turaqty túrde júzege asyratyn 19 áýe kompanııasyna qyzmet kórsetedi. Osy jyly tuńǵysh ret Seýl jáne Parıj qalalaryna reıster ashyldy. Astana áýejaıynda Qazaqstan Respýblıkasynyń barlyq oblys ortalyqtaryna, sondaı-aq TMD qalalaryna turaqty reıster júzege asyrylady. Áýejaı kún saıyn 12 myńǵa jýyq jolaýshyǵa, 140 ushý reısine qyzmet kórsetedi.
