Astana halyqaralyq áýejaıy jazǵy kestege kóshti
Jańa reısterdi oryndaıtyndardyń ishinde jańa áýe kompanııalary da bar. Olar - «LOT Polish Airline», «Finnair», «Wizz Air», «Air China», «Ural Airlines». Máselen, Fınlıandııanyń «Finnair» kompanııasy maýsym - qyrkúıek aralyǵynda EKSPO-2017 halyqaralyq mamandandyrylǵan kórmesin ótkizý kezeńinde Astana - Helsınkı baǵyttary boıynsha reıs ashýdy josparlap otyr. «Wizz Air» atty vengr loý-kost tasymaldaýshysy Astana men Býdapesht arasynda jańa avıabaǵytty ashady. Ol maýsymnyń 8-inen bastap beısenbi jáne jeksenbi kúnderi aptasyna eki ret oryndalady.
Astana áýejaıynyń taǵy bir jańa seriktesi - Polshanyń «LOT» áýe kompanııasy. Mamyrdyń 8-inen bastap aptasyna tórt ret Astana men Varshava arasynda jolaýshylar tasymaly júrgiziledi. Al «Star Alliance» óz reısin ashý arqyly qazirgi Astana - Beıjiń baǵyty boıynsha reısterdiń jıiligin ulǵaıtýdy josparlap otyr.
Budan basqa, sáýirdiń 26-synan bastap «Ýralskıe avıalınıı» avıakompanııasy Máskeý (Ramenskoe) baǵytynda aptasyna tórt reısti oryndaýdy bastaıdy. Sondaı-aq, «Scat Airlines» úsh jańa marshrýtta: Armenııa astanasy - Erevanǵa, Reseıdiń ońtústigindegi mıneraldy sýlarǵa, sondaı-aq, Máskeý oblysynda ornalasqan Halyqaralyq Jýkovsk áýejaıyna deıin qyzmet kórsetedi.
Al «Air Astana» aptasyna úsh ret Monǵolııa astanasy Ýlan-Batorǵa jańa baǵyt usynady. Sonymen qatar ishki jáne halyqaralyq baǵyttar boıynsha reıster sanyn ulǵaıtady. Budan bólek, «Atlas Global Jet» avıakompanııasy qoldanystaǵy Astana-Ystanbul baǵyty boıynsha reısterdi oryndaıdy.
