Astana halyqaralyq áýejaıy EQYU qatysýshylaryn qarsy alýǵa daıyn
ASTANA. 26 qarasha. QazAqparat - Búgin Kólik jáne kommýnıkatsııa mınıstri Ábilǵazy Qusaıynov elordalyq áýejaıda Astana qalasynda 1-2 jeltoqsanda ótetin EQYU Sammıtin kóliktik qyzmetpen qamtamasyz etý jónindegi jumys tobynyń qorytyndy otyrysyn ótkizdi.
Otyrysqa syrtqy ister, qorǵanys jáne ishki ister mınıstrlikteriniń, qalalyq ákimdiktiń jáne atalǵan forýmdy ótkizýge tartylatyn kólik jáne kommýnıkatsııa kesheni kásiporyndardyń ókilderi qatysty, dep habarlaıdy Kólik jáne kommýnıkatsııa mınıstrliginiń baspasóz qyzmeti.
Jumys toby kólik qyzmetiniń aldaǵy Sammıtke tolyqtaı daıyn ekenin atap ótti. Atap aıtqanda, keletin áýe kemeleri sanynyń kóptigine baılanysty áýejaı perrony 22 ushaq turaǵyna keńeıtildi. 113 arnaıy tehnıka satyp alynyp, basqa áýejaılardan 29 tehnıka tartyldy. Qar úıintekterin boldyrmaý maqsatynda 41 41 tazalaý tehnıkasy ázirlendi, sonymen qatar qalanyń kommýnaldyq qyzmetimen qajetti jaǵdaıda qosymsha tehnıka bólý jóninde kelisildi.
Qyzmet kórsetiletin áýe kemeleri sanynyń kóbeıýine jáne basqa da qyzmetterdiń ashylýyna baılanysty qosymsha mamandar tartyldy. Olardyń qatarynda basqa áýejaılar men avıakompanııalardan áýe kemeleri qyzmetin qamtamasyz etetin 65 ınjener men tehnıkter, sondaı-aq aǵylshyn tilin jete biletin astanalyq joǵary oqý oryndardyń stýdentter qatarynan 42 eriktiler bar. Oǵan qosa, «Eır Astana» avıakompanııasynan 80 adam tartyldy. Búgingi kúni, barlyq qatysty qyzmetkerlermen túsinikteme jumystary men qosymsha jattyqtyrý ótkizilip, áýejaıdyń jumys tártibi men qaýipsizdik sharalary jóninde aqparat berildi.
Astanalyq áýejaıda shekaralyq baqylaýdy ýaqytyly qamtamasyz etýdi uıymdastyrý maqsatynda halyqaralyq reıster jáne ishki reısterdiń kelý zaldarynda 8 jumys orny bar 4 qosymsha kabına, syrtqy ister mınıstrliginiń konsýldyq qyzmetine arnalǵan 3 jumys orny jasaqtaldy.
Budan buryn habarlanǵandaı, aýa raıynyń ózgerý yqtımaldyǵyna baılanysty Almaty men Qaraǵandy áýejaılary men temir jol vokzaldarynda joǵaryda atalǵandaı ázirlik jumystary júrgizilýde. Avıareıster bul qalalarǵa aýystyrylǵan jaǵdaıda, qonaqtardy temir jol jáne avtomobıl kóligimen jetkizý qarastyrylǵan.
