«Astana halyqaralyq áýejaıy» AQ-da memlekettik satyp alý zańnamasynyń buzylý faktileri anyqtaldy

Bul týraly QazAqparat Bas prokýratýranyń baspasóz qyzmetine silteme jasap habarlaıdy.

«Astana qalasynyń Áýe kólik prokýratýrasy jeke kásiporynnyń shaǵymy boıynsha «Astana halyqaralyq áýejaıy» aktsıonerlik qoǵamynda memlekettik satyp alý zańnamasynyń qoldanylýy jóninde tekseris júrgizgen. Tekseris júrgizý barysynda «AHÁ» AQ-y memlekettik satyp alýǵa qatysýshyny qoldanystaǵy zańnamada qarastyrylmaǵan biliktilik talaptaryna saı emes dep negizsiz qorytyndy shyǵarǵan. Osylaısha, memlekettik satyp alý zańnamasynyń buzylýyna jol berilgeni anyqtaldy», - delingen baspasóz aıǵaǵynda.

Prokýratýra málimetine qaraǵanda, atalmysh áreketti júzege asyrý arqyly kásiporyn belgili bir ótinim berýshiniń múddesin qorǵaǵany baıqalady. Osyǵan oraı, prokýratýra áýejaı basshylyǵynyń atyna zańdylyqtyń buzylýyn joıý týraly usynys engizilip, áýejaıdyń 9 qyzmetkeri tártiptik jazaǵa tartylǵan. «Sonymen qatar, kásiporynnyń 7 laýazymdy tulǵasyna qatysty Qazaqstan Respýblıkasynyń Ákimshilik quqyqbuzýshylyq týraly Kodeksiniń 167 baby 6 tarmaǵy boıynsha ákimshilik quqyq buzýshylyq týraly is qozǵalyp, memlekettik ýákiletti organnyń qaraýy negizinde tulǵalardyń ár qaısysyna 100 aılyq eseptik kórsetkish mólsherinde ákimshilik aıyppul salyndy. Nátıjesinde memleket paıdasyna 1 048 500 teńge óndirildi», - delingen baspasóz habarlamasynda.