Astana halqynyń basty problemalary qandaı
ASTANA. QazAqparat - Astana qalasy Qoǵamdyq keńesiniń tóraǵasy Sansyzbaı Esilov elorda halqy úshin qandaı máseleler ózekti ekenin atady, dep habarlaıdy QazAqparat tilshisi.
«Jalpy, Astanada 20 jyldyń ishinde sporttyq nemese mádenı nysandar bolsyn, turǵyn úı keshenderi bolsyn, órkendep, óz sıpatyna ıe boldy. Bul rette birqatar máseleler sheshildi. Alaıda men qala shetindegi mekender boıynsha másele baryn aıtqym keledi. Kóktal, Ońtústik-Shyǵys aýdandary bolsyn, eń aldymen ınfraqurylymǵa baılanysty problemalar áli de kóp. Qatty tósenish tóselmegen kóshelerdiń joqtyǵy taǵy bar. Sýmen qamtý jáne kanalızatsııalyq sýdy soryp syrtqa shyǵarý týrasynda da máseleler mańyzdy. Mysaly, Ońtústik-Shyǵys aýdanynyń oń jáne sol jaǵynyń kóptegen kóshelerinde ortalyqtandyrylǵan káriz júıesi joq», - dedi Sansyzbaı Esilov elorda ákimdiginde ótken jıynda.
Onyń aıtýynsha, elordada qoǵamdyq kólikke qatysty problemalar da barshylyq.
«Biraq, eń basty másele - qaladaǵy muqtaj adamdarǵa memleket tarapynan kómek kórsetý. Mine, biz mysaly kópbalaly otbasylardyń máselesin kórip otyrmyz. Múgedekterde, jalǵyzbasty adamdarda da másele kóp. Men ózim qalalyq ardagerler keńesiniń tóraǵasymyn. Biz ótken jyly elordadaǵy 14 myń zeınetkerdi qamtyp, saýalnama júrgizdik. Osy saýalnama arqyly 900 zeınetkerdiń memleket nemese qoǵam tarapynan áleýmettik kómekke muqtaj ekenin anyqtadyq. Ol zeınetkerlerdiń arasynda jalǵyz ómir súrip jatqany, tósekke tańylǵany, qarjylaı bolmasa da qoǵam tarapynan yqylasqa muqtaj qarttar bar. Ardagerler keńesi tarapynan osy sebepti kómekke muqtaj zeınetkerlerge kásiporyndar kómektese alatyndaı jumys júrgizýdemiz», - deıdi ol.
Sansyzbaı Esilovtyń aıtýyna qaraǵanda, elordada ekinshi dúnıejúzilik soǵystyń 76 ardageri turady.
Eske sala ketsek, buǵan deıin Astana qalasy Qoǵamdyq keńesiniń tóraǵasy Sansyzbaı Esilov elordadaǵy kópbalaly otbasylardyń máselesi týraly sóz qozǵap, olardyń baspana máselesin jeke kezek boıynsha sheshý kerektigin málim etken edi.
«Memleket bul máselege bet burady degen oıdamyn. Qazirgi ýaqytta Úkimet jumys tobyn quryp, atalmysh máseleni sheshýdi kózdep otyr. Kópbalaly otbasylardyń eń aldymen baspana máselesin sheshý kerektigi týraly bastamany 100 paıyz qoldaımyz. Sebebi, bul otbasylar kúrdeli materıaldyq jaǵdaıymen qosa baspanany jaldap turýǵa májbúr. 50-100 myń teńgege kishkene ǵana bólme jaldap turady. Sol sebepti, kópbalaly otbasylardyń eń aldymen baspana máselesin sheshý kerek. Jetim balalar, soǵys ardagerleri sanaty sııaqty kópbalaly otbasylardyń baspana boıynsha jeke kezegi bolýy tıis. Sebebi, qazirgi ýaqytta elordadaǵy baspana boıynsha ortaq kezekte 46 myńǵa jýyq adam tur», - deıdi Sansyzbaı Esilov.
