Astana halqynyń ósim qarqyny Almatydan bes ese joǵary
ASTANA. KAZINFORM – Astana halyq sanynyń ósý qarqyny boıynsha elimizdegi kóshbasshy qala bolyp otyr. Bul týraly Ulttyq statıstıka bıýrosynyń Astana qalasy boıynsha departamenti Kazinform agenttiginiń saýalyna bergen jaýabynda málimdedi.
Departament deregine sáıkes, 2026 jylǵy 1 sáýirdegi jaǵdaı boıynsha elorda halqynyń sany 1 mln 662 myń 755 adamǵa jetken. Sońǵy bes jylda, ıaǵnı 2021 jyldan beri Astana turǵyndarynyń sany 472 myńǵa jýyq adamǵa kóbeıgen.
Al 2026 jyly elordadaǵy halyq sanynyń ósim qarqyny 7,23 paıyzdy qurady. Bul elimizdegi basqa iri qalalarmen salystyrǵanda aıtarlyqtaı joǵary kórsetkish. Máselen, osy kezeńde Almaty halqy 2,45 paıyzǵa, Shymkent halqy 3,02 paıyzǵa, al Qaraǵandy halqy 1,34 paıyzǵa ósken.
Statıstıka derekteri Astananyń el ishindegi kóshi-qonnyń basty baǵyty bolyp qala beretinin kórsetip otyr. Jyl saıyn elimizdiń ár óńirinen myńdaǵan azamat turaqty turý úshin elordaǵa qonys aýdarady.
Sarapshylardyń pikirinshe, halyq sanynyń qarqyndy ósýine birneshe faktor áser etip otyr. Eń aldymen, jumys oryndarynyń shoǵyrlanýy, memlekettik mekemelerdiń ornalasýy jáne iskerlik belsendiliktiń artýy yqpal etedi. Sonymen qatar balalaryna sapaly bilim berýdi jáne ózderi úshin jańa múmkindikter izdegen otbasylar da elordany tańdaýǵa basymdyq berip keledi.
Turǵyndar sanynyń kóbeıýi turǵyn úıge, kólik ınfraqurylymyna jáne áleýmettik nysandarǵa degen suranysty arttyryp otyr. Osyǵan baılanysty qala bıliginiń aldynda mektepter, balabaqshalar, medıtsınalyq mekemeler men qoǵamdyq kólik jelisin odan ári damytý mindeti tur.
Ulttyq statıstıka bıýrosynyń málimetinshe, búginde Qazaqstandaǵy ár on birinshi turǵyn Astanada turady. Osy úrdis saqtalsa, elorda elimizdegi eń iri ári qarqyndy damyp kele jatqan megapolısterdiń biri retindegi ornyn odan ári nyǵaıta túspek.
Buǵan deıin Astanada salynatyn jańa medıtsınalyq nysandar týraly habarlanǵan edi.
