Astana halqynyń ómir súrý uzaqtyǵy 78,8 jasqa jetti
ASTANA. KAZINFORM — Elorda halqynyń ómir súrý uzaqtyǵy 78,8 jasqa jetti. Bul týraly Astana qalasy ekonomıka jáne bıýdjettik josparlaý basqarmasynyń basshysy Aıjan Túgelbaeva aıtty.
Spıker ótken jyly elordada jumyssyzdyq deńgeıi tómendep, áleýmettik kórsetkishter jaqsaryp, qalalyq ınfraqurylym qarqyndy damyǵanyn tilge tıek etti.
– Qaladaǵy jumyssyzdyq deńgeıi 4,3%-ǵa deıin tómendep, josparlanǵan 4,6%-dan az boldy. Damý jospary kezeńinde 280 myńnan astam jańa jumys orny qurylyp, onyń 87,2 myńy 2025 jyly ashyldy. Halyqtyń ómir súrý uzaqtyǵy 73,11 jastan 78,8 jasqa jetip, bastapqy deńgeımen salystyrǵanda 5,6 jylǵa artty,-dedi basqarma basshysy.
Sonymen qosa ol áleýmettik ınfraqurylymǵa erekshe nazar aýdarylǵanyn atap ótti.
– Qalada balalar sany 410 myńnan 530 myńǵa deıin ósti. Bul óz kezeginde bilim berý júıesine qosymsha júkteme túsirdi. Osyǵan baılanysty sońǵy jyldary 110 myń oqýshy ornyna arnalǵan 44 mektep salyndy, onyń 23-i 2025 jyly paıdalanýǵa berildi. Nátıjesinde úsh aýysymdy oqytý tolyq joıyldy,-dedi Aıjan Álimqyzy.
Onyń sózinshe, mektepke deıingi bilim berý salasyn qamtý da 97,3%-ǵa jetken, bul baǵytqa shamamen 60 mlrd teńge bólingen.
– Jalpy alǵanda, bilim berý, densaýlyq saqtaý, mádenıet, sport jáne áleýmettik qorǵaý salalaryndaǵy mindettemeler tolyq kólemde oryndaldy,-dedi spıker.
Buǵan deıin Astana halqy 2035 jylǵa qaraı 2,4 mln adamǵa jetýi múmkin ekenin jazdyq.
