Astana halqy jerasty sýyn da tutyna bastaıdy — vıtse-mınıstr

ASTANA. KAZINFORM — Ónerkásip jáne qurylys mınıstriniń orynbasary Qýandyq Qajkenov Májiliste ótip jatqan Úkimet saǵatynda Astananyń sýmen qamtamasyz etýge baǵyttalǵan jobalardyń qunyn atady.

— Astana sý qoımasy 1969 jyly 500 myń turǵynǵa eseptelip salynǵan bolatyn. Byltyr elorda turǵyndarynyń bári sý berýdegi irkilisterge tap kelgen shyǵar. Qalada baspana qurylysy men halyq sany ósip jatqanyn eskersek, bul másele ýshyǵa túspese, báseńdemeıdi. Astanamyzdy sýmen qamtamasyz etetin rezerv kóz joq ázirge. Osy máseleni qalaı sheshpekshisizder, — dep suraǵan Májilis depýtat Pavel Kazantsev.

Ónerkásip jáne qurylys mınıstriniń orynbasary Qýandyq Qajkenov dál qazir Astana halqy sýdan tapshylyq kóretindeı qaýip joq ekenin aıtty. 

— Eki jyl buryn jazda Astananyń jekelegen aýdandarynda sý tapshylyǵy bolǵan. Tıisti sharalar qabyldanyp, 2023 jyldyń aıaǵynda № 3 sý soryp, súzetin stansa qoldanysqa berildi. Qazirgi tańda táýligine 350 myń tekshe metr sý tutynyp otyr. Bizdegi sý súzetin stansalardyń qýaty — 410 myń tekshe metr, ıaǵnı damý keleshegin eskergenniń ózinde Astanada sý tapshylyǵy joq, — dedi ol.

Qýandyq Qajkenov Astananyń rezervti sý kózin qalyptastyrý úshin birneshe joba qolǵa alynǵanyn eske saldy.

— Onyń birinshisi — № 4 sý sorý-súzý stansasyn salý. Qanysh Sátpaev kanalynan sý burý kanalyn da salý kerek. Qazirgi tańda bul jobanyń smetalyq qujattary ázirlenip jatyr. Bul joba qosymsha 200 myń tekshe metr sýmen qamtamasyz etýge múmkindik beredi. Ekinshi joba — Nura sý kenishinen sý burý arnasyn salý jobasy. Osy arqyly táýligine 308 myń tekshe metrdeı jerasty sýyn alýǵa bolady. Bul jobanyń smetalyq qujattary daıyn. Mamyr aıynda vedomstvoaralyq saraptamaǵa jiberý josparlanǵan. Bul jobanyń mejelengen quny 56 mlrd teńgedeı. Úshinshi joba — Telman sý sorý stansasynan tehnıkalyq sý burý jobasy. Quny — 17,6 mlrd teńge. Bıyl osy jobaǵa jergilikti bıýdjetten 3,2 mlrd teńge bólinip otyr. Osynyń bári Astananyń joǵary damý qarqynyn eskergenniń ózinde keleshektegi sý máselesin sheshýge múmkindik beredi. Tapshylyq bolmaıdy, — dedi vıtse-mınıstr.

Aıta ketý kerek, Kaspıı máselesin sheshý aıasynda Qazaqstan Reseıge Edil sýyn birlesip retteý týraly usynys jasamaqshy.