Astana halqy 2035 jylǵa qaraı 2,4 mln adamǵa jetýi múmkin — ákim
ASTANA. KAZINFORM — 2035 jylǵa qaraı Astana halqynyń sany 2,3-2,4 mln adamǵa jetedi dep boljanyp otyr. Osyǵan baılanysty elordada jańa bas jospar ázirlenip, qajetti ınjenerlik jáne áleýmettik ınfraqurylym qamtylyp jatyr.
Bul týraly qala ákimi Jeńis Qasymbek Jibek joly telearnasynyń «Ýáde» baǵdarlamasynda aıtty. Ákimniń málimetinshe, jańartylǵan bas jospar aldaǵy 2-3 aı ishinde qabyldanady dep kútilip otyr. Qujatta halyq sanynyń ósýine baılanysty áleýmettik nysandar men kúndelikti ómirge qajetti ınfraqurylymdardy damytý máselesi qamtylǵan.
— Qazir qalanyń bas josparyn jańartyp jatyrmyz. Ony 2-3 aıdyń ishinde qabyldaımyz dep josparlap otyrmyz. Bas josparǵa sáıkes, 2035 jylǵa deıin Astana halqynyń sany 2,3-2,4 mln adamǵa jetedi dep boljanyp otyr. Sondyqtan sol kezeńge qajetti jalpy ınfraqurylymdy daıyndap jatyrmyz. Áleýmettik nysandar men kúndelikti ómirge qajet ınfraqurylymdardyń barlyǵy josparda kózdelgen, — dedi ákim.
Jeńis Qasymbek atap ótkendeı, qazir elordada turaqty turatyn halyq sany 1,7 mln adamǵa jetken. Sonymen qatar kún saıyn Astanaǵa jaqyn eldi mekenderden keletin adamdar sany 200 myńnan asady.
— Qazirgi kezde qalada turaqty turatyn adamdar sany 1,7 mln-ǵa jetti. Kúndelikti mıgratsııa bar. Qosshy qalasynan, Talapkerden, Qoıandydan, Arshalydan, Nura aýdanynan jáne basqa da aýyldardan keletin adamdar sany 200 myńnan asady. Tek Qosshynyń ózinen kún saıyn 60-70 myń adam qatynap júredi. Sonymen qatar qalada tirkeýsiz turyp, jumys istep júrgen shamamen 100 myń adam bar. Osylaısha kún saıyn Astanada 2 mln-ǵa jýyq adam bolady, — dedi ákim.
Sonymen qatar Jeńis Qasymbek elordadaǵy aýyz sý máselesine de toqtaldy. Onyń aıtýynsha, qazirgi ýaqytta qalada sý tapshylyǵy joq jáne birneshe jylǵa jetetin qor qalyptasqan.
— Buǵan deıin aýyz sý tapshylyǵy boldy. Qazir ondaı másele joq. Bizde birneshe jylǵa jetetin profıtsıt bar. Úshinshi sorǵy-súzgi stantsııasyn aıaqtadyq. Bul joba aldaǵy 3-4 jylǵa kepildik berip otyr. Sonymen qatar jańa joba bastaldy. Sátbaev atyndaǵy Ertis — Qaraǵandy kanalynan sý qubyry tartylyp jatyr. Joba 2028-2029 jyldary aıaqtalady. Sonyń nátıjesinde qalada tórtinshi stantsııa paıda bolady. Joba iske qosylǵannan keıin aldaǵy 10 jylǵa jetetin múmkindik bolady. Sý máselesi tolyq sheshiledi. Qazir sý tapshylyǵy joq. Alaıda kepildik bolý úshin osyndaı ınfraqurylym qajet, — dedi ol.
Buǵan deıin Qazaqstan halqynyń sany jóninde jańa derekter jarııalanǵanyn jazǵan edik.
