Astana halyqaralyq qarjy ortalyǵy jarty jylda 2,6 mlrd dollar ınvestıtsııa tartqan

ASTANA. KAZINFORM — Astana halyqaralyq qarjy ortalyǵy jarty jylda 2,6 mlrd dollar ınvestıtsııa tartyp, 500-den astam jańa kompanııa tirkegen.

Ortalyq taratqan resmı málimet boıynsha qańtar-maýsym aralyǵynda AHQO-ǵa 567 jańa kompanııa tirkelgen. Onyń ishinde 4 fınteh-kompanııa, 5 qyzmet kórsetýshi (ASP) kompanııa jáne qarjylyq lıtsenzııasy bar 7 kompanııa qosyldy. Osylaısha ortalyqqa 85 elden jalpy sany 4030 kompanııa tirkelip otyr.

— AHQO ekojúıesi arqyly 6 aı ishinde el ekonomıkasyna 2,6 mlrd AQSh dollar ınvestıtsııa keldi. Jalpy ortalyq qurylǵannan beri tartylǵan ınvestıtsııalar kólemi 16,9 mlrd AQSh dollarynan asty. 2025 jyldyń birinshi jartyjyldyǵynda AHQO-da tirkelgen kompanııalar memleket bıýdjetine 70 mlrd teńgeden asa kólemde salyq tóledi, — deıdi ortalyqtyń basqarýshysy Renat Bekturov.

Eske salsaq, bir aı buryn Premer-mınıstrdiń orynbasary — Ulttyq ekonomıka mınıstri Serik Jumanǵarın Astana halyqaralyq qarjy ortalyǵynda qosylǵan qun salyǵy men korporatıvtik tabys salyǵynan jaltarý mehanızmi bar ekenin moıyndaǵan bolatyn.