Astana halyqaralyq áýejaıynda 2500-den astam jolaýshy óz reısin kútip otyr
30 jeltoqsan kúni saǵat 15:00 - 00:00 aralyǵynda jalpy sany 29 reısti oryndaý josparlanǵan. Alaıda, onyń 21-i elordadaǵy qolaısyz aýa raıyna baılanysty keshiktirilse, 8 reıs keıinge qaldyryldy.
Qazir Astana halyqaralyq áýejaıynda 2500-den astam jolaýshy óz reısin kútip otyr, dep habarlaıdy Kazinform QR Kólik mınıstrliginiń baspasóz qyzmetine silteme jasap.
Mınıstrliktiń baspasóz qyzmetiniń málimetterinshe, aýa raıy saldarynan áýe joldary kestesiniń buzylýyna baılanysty QR Kólik mınıstri Marat Qarabaev jedel shtab quryp, Astana halyqaralyq áýejaıyna barlyq áýe kompanııasynyń ókilderin jınady. Arnaıy qurylǵan top pen áýe kompanııasynyń ókilderi jolaýshylar arasynda túsindirý jumystaryn júrgizip, saýaldaryna jaýap berip jatyr.
Áýejaıdaǵy jolaýshylar úshin Terminals Astana Airport Management basshylyǵy 2 myńnan astam portsııa ystyq tamaq pen ystyq sýsyn taratty. Reısteri keshikken jolaýshylardyń arasynda balalar men jasóspirimder de bar. Olarǵa merekelik kóńil-kúı syılaý úshin Aıaz ata men Aqshaqar oıyn oınatyp, jańa jyldyq syılyqtar taratýda. Odan bólek, Astana qalasynyń ónerpazdary reısin kútip otyrǵan jolaýshylarǵa arnap ónerlerin kórsetýde.
Aıta keterligi, jolaýshylar aýa raıy qolaısyzdyǵynan bolǵan keleńsizdikke túsinistik tanytyp, qajetti kómek kórsetip jatqan mamandarǵa alǵystaryn bildirip jatyr.
Qazir Astana halyqaralyq áýejaıynyń áýe aılaǵy ashyq. Alaıda, áýeaılaqtaǵy aýa raıy áli de ushý jáne qoný úshin qolaısyz. Sondyqtan áýe kompanııalary reısterin keshiktirý jáne keıinge qaldyrý týraly sheshim qabyldaýda.
«Áýejaı jolaýshylarǵa táýlik boıy qyzmet kórsetedi. Eger Siz 30-31 jeltoqsan kúnderi áýe kóligimen saparǵa shyǵýdy josparlaǵan bolsańyz, reısińizdiń statýsyn áýejaıdyń nn-airport.kz resmı saıtynan qaraýǵa nemese 8(7172)702-999 nómiri boıynsha Call ortalyqqa habarlasýǵa bolady»,-delingen habarlamada.
