Astana halyqaralyq áýejaıy jolaýshylarǵa eskertý jasady

ASTANA. KAZINFORM – Astana halyqaralyq áýejaıy 19 shilde kúni tehnıkalyq jumystar júrgizilýine baılanysty elektrondyq servıster ýaqytsha jumys istemeıtinin habarlady.

– Astana halyqaralyq áýejaıy «Ulttyq aqparattyq tehnologııalar» AQ habarlamasyna sáıkes, 2025 jylǵy 19 shilde kúni saǵat 02:00-den 08:00-ge deıin kompanııanyń tsıfrlyq servısteriniń turaqty jumysyn qamtamasyz etý maqsatynda josparly tehnıkalyq jumystar júrgiziletinin habarlaıdy. Atalǵan ýaqyt aralyǵynda kelesi memlekettik elektrondyq servıster ýaqytsha qoljetimsiz bolýy múmkin: eGov portaly, eGov mobile qosymshasy («Tsıfrlyq qujattar» qyzmetin qosa alǵanda), e-Otinish, E-license jáne ózge de memlekettik qyzmetter, - delingen habarlamada.

Tehnıkalyq jumystar túngi ýaqytta, paıdalanýshylardyń belsendiligi tómen kezeńde júrgiziledi. Degenmen múmkin bolatyn qolaısyzdyqtardyń aldyn alý úshin barlyq qajetti operatsııany aldyn ala aıaqtaýdy jáne áýejaıdaǵy tirkelý, tekseristen ótý kezinde qajet bolýy múmkin jeke kýálik, pasport, týý týraly kýálik jáne basqa da qujattardyń túpnusqalaryn ózińizben birge alyp júrý usynylady.

- Túsinistik tanytqandaryńyz úshin alǵys aıtamyz, - dedi áýejaıdan.

Aıta keteıik, Almaty áýejaıyna kirý-shyǵý joly ýaqytsha ózgeredi.