«Astana Habqa» 49 mln teńge ınvestıtsııa tartyldy

ASTANA. QazAqparat - «Astana Hab» tehnologııalyq parkine 49 mln teńge ınvestıtsııa tartyldy. Bul týraly búgin Májilistegi «Tsıfrlyq Qazaqstan» memlekettik baǵdarlamasyna arnalǵan Úkimet saǵatynda QR Aqparat jáne kommýnıkatsııalar mınıstri Dáýren Abaev aıtty, dep habarlaıdy QazAqparat tilshisi.

«Bıylǵy jyldyń 6 qarashasynda Memleket basshysynyń qatysýymen «Astana Hab» tehnologııalyq parki ashyldy. Onyń aıasynda osy jyly eki akseleratsııalyq baǵdarlama ótkizildi. 49 mln teńge ınvestıtsııa tartylyp, 20 startap-joba irikteldi. Qazirgi ýaqytta úshinshi baǵdarlama ótkizilip jatyr. Ol boıynsha 38 joba irikteldi», - dedi ol.

Onyń atap ótýinshe, ekojúıe startapynyń tolyqqandy qyzmet etýi maqsatynda osy jyldyń shilde aıynda «Venchýrlyq qarjylandyrý jónindegi» óte mańyzdy zań qabyldandy. Zań boıynsha venchýrlyq ınvestıtsııalardyń normasy belgilenip, Astana habtyń sheteldik qatysýshylaryna eńbek tártibi men vızalyq baǵytta jeńildikter jasaldy. Bul sheteldik rezıdentter men sarapshylardy bizdiń elge tartý maqsatynda qolǵa alynǵan shara. Sondaı-aq, tehnopark qatysýshylary úshin salyqtyq jeńildikter qarastyrylǵan.

«Basym baǵattardyń biri retinde Astana habtaǵy zerthanalardy ataýǵa bolady. Otandyq jáne sheteldik ІT-kompanııalardyń zertteý ortalyqtary da sonda ornalasqan. Olar ǵylymı-zertteý jumystarymen alańsyz aınalysady. Qazir Astana habta IBM, Cisco, NOKIA, Huawei jáne taǵy basqa kompanııalardyń zerthanalary men zertteý ortalyqtary bar», - dedi Dáýren Abaev.


Sonymen qatar mınıstr Astana hab bazasynda ujymdyq ınnovatsııalardy damytýǵa baǵyttalǵan startaptardy qoldaý boıynsha jumystar júrgizilip jatqanyn aıtty.