Astana gımnastary Qazaqstan chempıonaty men kýbogynda 23 medal jeńip aldy
ASTANA. KAZINFORM — Shymkentte ótken kórkem gımnastıkadan el chempıonaty men Qazaqstan kýbogynda elordalyq sportshylar 11 altyn, 7 kúmis jáne 5 qola medal ıelendi. Bul týraly Astana qalasynyń ákimdigi málim etti.
Respýblıkalyq dodaǵa elimizdiń 15 oblysy men Astana, Almaty jáne Shymkent qalalarynan 400-den astam sportshy qatysty. Jarysta sport sheberleri men sport sheberligine úmitkerler jeke jáne toptyq jattyǵýlar boıynsha baq synady.
Qazaqstan Respýblıkasynyń kýbogynda elordalyq gımnastar 9 júldeli orynǵa ıe boldy. Onyń 3-eýi altyn, 2-eýi kúmis jáne 4-eýi qola.
Sport sheberligine úmitkerler arasyndaǵy toptyq kópsaıysta «Pantery» komandasy altyn, «Samǵaý» komandasy qola júlde jeńip aldy. Al sport sheberleri arasynda «Fýror» komandasy birinshi, «Zoloto» komandasy úshinshi orynǵa ıe boldy.
Jeke kópsaıysta sport sheberleri arasynda Aıǵanym Rysbek kúmis, Darııa Kýsherbaeva qola júldeger atandy. Sport sheberligine úmitkerler arasynda Anel Dınısheva altyn, Anna Rýbtsova kúmis, Evelına Belokýrova qola medal ıelendi.
Qazaqstan Respýblıkasynyń chempıonatynda elordalyq sportshylar 14 júldeli orynǵa ıe boldy. Onyń 8-i altyn, 5-eýi kúmis jáne 1-eýi qola.
Toptyq jattyǵýlarda «Pantery» komandasy bes doppen jattyǵýda altyn, bes taspamen jattyǵýda kúmis medal jeńip aldy. Al «Fýror» komandasy bes doppen, sondaı-aq shyǵyrshyqtar men shoqparlar baǵdarlamasynda eki altyn júldege qol jetkizdi.
Jeke jattyǵýlarda Aıǵanym Rysbek doppen jattyǵýda altyn, shyǵyrshyqpen kúmis jáne taspamen qola medal ıelendi. Darııa Kýsherbaeva taspamen, Sofııa Kýrıachenko doppen jattyǵýda kúmis júldeger atandy.
Sport sheberligine úmitkerler arasynda Anel Dınısheva doppen, urshyqpen jáne taspamen jattyǵýlarda úsh altyn, shyǵyrshyqpen jattyǵýda bir kúmis medal jeńip aldy. Anna Rýbtsova shyǵyrshyqpen jattyǵýda el chempıony atandy.
