Astana ǵımarattaryna smaıldar jabystyryla bastady
ASTANA. QazAqparat - 12 mamyr kúni Astanada «Jastar jalyny - 2017» gala kontsertiniń ashylýynda qalany abattandyrý salasyndaǵy kemshilikterdi anyqtaýǵa baǵyttalǵan jastar qozǵalysy bastaldy.
Belsendiler Respýblıka dańǵylynda ornalasqan ǵımarattardy qarap shyqty.
Jastar kásipkerlik nysandardy, mádenı, sport, bilim, densaýlyq saqtaý mekemelerin, turǵyn úılerdi, qurylys alańdaryn tekserip, baǵalady.
Qozǵalystyń maqsaty - joǵaryda atalǵan nysandardyń aýmaǵynda tazalyqty saqtaýdy monıtorıngileý. Eshqandaı eskertýler bolmaǵan ǵımarattardyń qasbetterine «óte jaqsy» degen baǵany bildiretin smaıl, al aýmaǵyn jınaýdy qajet etetin nemese tazalanbaǵan kásiporyndarǵa «bul jerdi jına» degen belgini bildiretin qyzyl smaıl jabystyrylady.
Qozǵalys Astana ákimi Áset Isekeshevtiń bastamasyn qoldaý aıasynda quryldy. Elorda basshysy jastardy qala boıynsha qozǵalys quryp, bes jobany qolǵa alýdy usyndy: «Astana - deni saý jáne sport súıetin adamdardyń qalasy», «Astana - meıirimdi jáne júzi jyly adamdar qalasy», «Astana - taza qala», «Astana Smart City», «Aqjarqyn Astana».
