Astana gıdteri endi halyqaralyq ádisteme boıynsha maman daıarlaıdy

ASTANA. KAZINFORM — Astanada gıdterdi halyqaralyq ádisteme boıynsha daıarlaıtyn alǵashqy jattyqtyrýshylar daıyndaldy, dep habarlaıdy qala ákimdiginiń resmı saıty.

Astana gıdteri endi halyqaralyq ádisteme boıynsha maman daıarlaıdy
Foto: Astana ákimdigi

Elordada alǵash ret Dúnıejúzilik týrıstik gıdter qaýymdastyqtary federatsııasynyń (WFTGA — World Federation of Tourist Guide Associations) halyqaralyq ádistemesi boıynsha ulttyq jattyqtyrýshylardy daıarlaý kýrsy uıymdastyryldy. Jobany «Astana Tourism» týrızmdi damytý ortalyǵy iske asyrdy. Bul elordadaǵy kásibı týrıstik qaýymdastyqty damytý jolyndaǵy mańyzdy qadam boldy.

Baǵdarlamaǵa irikteýden ótken Astananyń 12 tájirıbeli gıdi men ekskýrsııa júrgizýshisi qatysty. Úmitkerlerge qoıylǵan negizgi talaptar — joǵary biliminiń bolýy, keminde eki jyldyq jumys tájirıbesi jáne aǵylshyn tilin meńgerýi.

Astana gıdteri endi halyqaralyq ádisteme boıynsha maman daıarlaıdy
Foto: Astana ákimdigi

— Oqý eki apta boıy WFTGA uıymynyń Ulybrıtanııadan kelgen halyqaralyq jattyqtyrýshysy Vıola Lıýıstiń jetekshiligimen ótti. Baǵdarlama aıasynda gıdterdi daıarlaýdyń halyqaralyq standarttaryn meńgerýge, kásibı daǵdylar men oqytý ádistemesin damytýǵa baǵyttalǵan teorııalyq jáne praktıkalyq sabaqtar uıymdastyryldy, — delingen habarlamada.

Kýrstyń basty maqsaty — Astanada ulttyq jattyqtyrýshylar tobyn qalyptastyrý. Olar aldaǵy ýaqytta jańa gıdterdi óz betinshe oqytyp, salalyq qaýymdastyqtar janynan WFTGA standarttaryna saı biliktilikti arttyrý kýrstaryn ótkize alady.

Astana gıdteri endi halyqaralyq ádisteme boıynsha maman daıarlaıdy
Foto: Astana ákimdigi

Uıymdastyrýshylardyń aıtýynsha, gıd pen ekskýrsııa júrgizýshisi — týrısterge kórikti jerlerdi tanystyratyn maman ǵana emes, sonymen qatar qalanyń tarıhyn, mádenıetin jáne búgingi tynys-tirshiligin qonaqtarǵa túsindirip beretin ókil. Týrıstiń qala týraly alǵan áseri men oǵan qaıta oralǵysy kelýi kóbine gıdtiń kásibı sheberligine baılanysty.

Astanada WFTGA halyqaralyq ádistemesi negizinde ulttyq jattyqtyrýshylardy daıarlaý kýrsy alǵash ret ótkizildi. Bul bastama qalada halyqaralyq oqytý standarttaryn engizýge, ekskýrsııa qyzmetiniń sapasyn jaqsartýǵa jáne týrızm salasyn júıeli damytýǵa múmkindik beredi.

Osyǵan deıin Soltústik Qazaqstan oblysynda týrıstik salada bilikti mamandar tapshylyǵyn azaıtý maqsatynda gıdter men ekskýrsovodtarǵa arnalǵan on kúndik oqý kýrsy ótip jatqanyn jazǵanbyz.