«Astana» fýtbol komandasynyń kelesi oıynyn ótkizý orny talqylanyp jatyr - elorda ákimi
«Biz bul turǵyda tıisti jumystardy atqaryp jatyrmyz. Qazirgi kezde osy máseleni QR Mádenıet jáne sport mınıstrimen talqylaýdamyz. Stadıonda óte úlken shara josparlanyp otyr. Búginde oǵan óte úlken daıyndyq júrip jatyr, ıaǵnı aýqymdy jumystar júrgizilýde. Qazaq handyǵynyń 550 jyldyǵyna arnalǵan bul sharaǵa (Astana Arenada) ózge elderdiń memleket basshylary qatysady dep kútilýde. Bul óz kezeginde tarıhı oqıǵa jáne úlken daıyndyqty qajet etedi»,-dedi ákim tilshilerge bergen suhbatynda.
Sonymen qatar ákim óz sózinde «Astana» fýtbol komandasy Chempıondar lıgasynyń irikteý synynda fınlıandııalyq HIK komandasymen ótken kezdesýdegi jeńisin aıryqsha qýanyshpen qabyldaǵanyn aıta kele, «biz bul jeńisti kúttik. Bul qazaqstandyq fýtboldyń, Astana komandasynyń jetistigi. Bul aıtýly oqıǵa. Qazirgi kezde biz osy máseleni sheship (komanda oıynyn ótkizý ornyn) jatyrmyz»,-dedi.
Aıta keteıik, buqaralyq aqparat quraldarynda «Astana» komandasynyń APOEL-men ótetin kezdesýi Almatyda ótetindigi habarlanǵan bolatyn.
Budan buryn málim etilgendeı, Qazaqstan chempıony «Astana» fýtbol klýby Chempıondar lıgasynyń pleı-off synynda kıprlik "APOEL" komandasymen bolatyn alǵashqy oıyndy 18 tamyzda óz alańynda ótkizedi.
Al qarymta kezdesý Kıprde 26 tamyzda bolady dep josparlanýda. Aıta ketý kerek, jeńimpaz lıganyń toptyq kezeńine ótse, jeńilgeni Eýropa Lıgasyna ótedi.
"Astana" Chempıondar lıgasyna alǵash ret qatysýda. Ekinshi irikteý kezeńinde elordalyq komanda slovenııalyq "Marıbordy" tize búktirgen bolatyn. Keıin týrnırden HIK-ti yǵystyrdy. Pleı-off kezeńine ótken "Astana" 700 000 eýro tabysqa keneldi. Eger APOEL komandasynan basym tússe, taǵy 12 mln. eýro alýy yqtımal.
