«Astana» fýtbol klýbynyń jańa quramy men logotıpi tanystyryldy
ASTANA. QazAqparat - Búgin elordalyq «Astana» fýtbol klýby óziniń jańa quramy men formasyn jáne logotıpin tanystyrdy, dep habarlaıdy «QazAqparat» tilshisi.
Jýrnalısterge bergen suhbatynda klýb prezıdenti Qaısar Bekenov ujymǵa Qazaqstannan tórt fýtbolshy jáne úsh legıoner qabyldanǵanyn aıtty. Jalpy, «Astananyń» quramynda jeti sheteldik sportshy bar.
«Meniń oıymsha, biz selektsııalyq jumysty jaqsy ótkizdik. Bizdiń quramnan artyq Qazaqstanda myqty top joq. Aldymyzda úlken chempıon bolý mindeti tur.Jattyqtyrýshylar men oıynshylar quramy bıyl aldymyzǵa osyndaı úlken maqsat qoıýǵa múmkindik berip otyr», - dedi Qaısar Bekenov.
Onyń aıtýynsha, fýtbol klýby aǵymdaǵy jyldyń aqpan aıynda quramyna engen «Astana» Prezıdenttik kásipqoı sport klýbymen yntymaqastyq ornatyp, júıeli jumys istep jatyr.
«Birlesip marketıngtik is-sharalardy júzege asyryp, keńesip otyramyz. Josparymyz - Astananyń bedelin arttyryp, tutas elimizdiń ataǵyn halyqaralyq arenada asqaqtatý. Aldymyzǵa qoıylǵan bul bizdiń basty mindetimiz bolyp tabylady», - dedi ol.
Aıta keterligi, 15 naýryzda «Astana» óz jerinde taldyqorǵandyq «Jetisý» komandasyn qabyldaıdy. Oıyndy tamashalaımyn degenderge, kirý tegin bolatynyn aıta keteıik. Odan soń shymkenttik «Ordabasy» men qyzylordalyq «Qaısar» komandaralymen kezdesý josparlanǵan.
