«Astana» fýtbol klýbynyń bas dırektory taǵaıyndaldy
ASTANA. KAZINFORM — «Astana» fýtbol klýby bas dırektor bolyp Altaı Daýmovtyń taǵaıyndalǵanyn habarlady.
Elordalyq klýbtyń baspasóz qyzmetiniń habarlaýynsha, Altaı Daýmovtyń qazaqstandyq fýtbol salasynda kópjyldyq tájirıbesi bar. Bul taǵaıyndaýǵa deıin ol Qazaqstan fýtbol federatsııasynyń qurylymynda túrli qyzmetter atqarǵan, sondaı-aq QFF prezıdenti laýazymyna úmitker bolǵan.
Daýmov UEFA CFM (Certificate in Football Management) baǵdarlamasynyń dıplomyna ıe jáne Qazaq sport jáne týrızm akademııasynda «Sporttyq menedjment» mamandyǵy boıynsha doktorantýrany támamdaǵan.
Buǵan deıin ol «Jetisý» fýtbol klýbynda kommertsııalyq dırektor qyzmetin atqardy. Sondaı-aq Qazaqstan halyqaralyq fýtbol mektebin qurýǵa qatysyp, Qazaq sport jáne týrızm akademııasy janyndaǵy fýtbol klýbyn basqardy. Ol 2024 jyldyń sońynda Qazaqstan fýtbol federatsııasy prezıdentiniń saılaýyna qatysyp, otandyq fýtboldy reformalaý baǵdarlamasyn usynǵan bolatyn.
Eske salaıyq, Qazaqstan Premer-lıgasynyń 13 týrynda «Astana» 22 upaı jınap, týrnırlik kestede tórtinshi orynda tur.
Aıta keteıik, «Astana» fýtbol klýbynyń bas dırektory Qaısar Bekenov qyzmetinen ketti.
