«Astana» frantsııalyq «Renn» komandasynan jeńilip, Eýropa lıgasymen qosh aıtysty

Biz budan buryn búgingi kezdeýdiń eki komanda úshin de mańyzy zor ekenin aıtyp ótken edik. Eki komanda da sońǵy týrǵa deıin jarysty jalǵastyrý múmkindiginen qol úzgen joq. «Astana» segiz upaımen ekinshi orynda tursa, «Renn» 6 upaımen úshinshi orynǵa jaıǵasty. Bizdiń komandaǵa teń nátıjeniń ózi jarysty jalǵastyrýǵa jol ashatyn edi. Al «Renn» úshin tek jeńis qajet boldy.

Atalmysh kezdesýde alǵashqy mınýttan «Astana» sapynda Nenad Erıch, Baktıer Zaınýtdınov, Evgenıı Postnıkov, Marın Anıchıch, Antonıo Rýkavına, Ivan Maevskıı, Laslo Klıaınhaısler, Rıchard Almeıda, Marın Tomasov, Pedro Enrıke men Djýnıor Kabananga shyqty. Olarǵa qarsy «Renn» Abdýlaı Dıallo, Ramı Bensebaını, Damen Da Sılva, Mesher, Amarı Traore, Benjamen Býrıgo, Benjamen Andre, Kleman Grene, Ismaıla Sarr, Teozon Sıbacho, Hatem Ben-Arfa oınady.

Sondyqtan kezdesý bastalǵan sátten alań ıeleri shabýyl shebin kúsheıtti. Oıyn taǵdyryn erterek sheshýge tyrysty. Frantsýz ftbolshylary bizdiń qaqpa mańynda jıi boı kórsetti. Keıbir sátte alań ıeleri múlt ketse, endigi bir sátte «Astana» qaqpashysy Nenad Erıch sheberlik kórsete bildi. Máselen, 43-mınýtta «Renn» fýtbolshysy Hatem Ben Arfa joıqyn soqqyny bizdiń qaqpaǵa baǵyttady. Bul sátte Nenad Erıch óz ornynan tabyla bildi.

Ekinshi kezeńde «Astana» qorǵanys shebin kúsheıte tústi. Jartylaı qorǵaýshy Rıchard Almeıdanyń ornyna qorǵaýshy Abzal Beısebekov shyqty. «Renn» oıynshylary taǵy da bizdiń qorǵanysty mazalaı tústi. Al 67-mınýtta «Astana» qorǵaýshysy Baktıer Zaınýtdınov qarsylastar oıynshysyn óz aıyp alańynda shalyp jyqty. Tóreshi oılanbastan penaltı belgiledi. «Renn» fýtbolshysy tepken dopty Nenad Erıch qaıtarǵan edi. Degenmen alań ıeleri onyń qaıtarǵan dobyna erterek jetti. Osylaısha alań ıeleri gol soǵyp ketti. Ol Ismaıl Sarrdyń enshisine jazyldy. Ol 72-mınýtta osy kezdesýdegi óziniń ekinshi golyn soqty. Búgingi kezdesýde «Renn» 2:0 esebimen jeńiske jetip, jarystyń kelesi satysyna shyqty.

Budan keıin «Astana» oıynshylary es jıǵandaı boldy. Alań ıeleri qaqpasy mańynda birneshe qaýipti sátter uıymdastyrdy. Degenmen onyń birinde bizdiń jigitter múlt ketse, endigisinde frantsýz qaqpashysy sheberlik kórsetti.  

Aıta ketelik, «Astana» byltyr Eýropa lıgasy toptyq kezeńinen jarystyń 1/16 fınaldyq kezeńine tuńǵysh ret joldama alǵan edi. Ol joly sońǵy týrda Chehııanyń «Slavııa» komandasynan 1:0 esebimen basym túsken edi.

«Astana» bıylǵy Eýropa lıgasy toptyq kezeńindegi oıyndaryn sátti bastaǵan edi. Aldymen 20 qyrkúıekte Kıevte jergilikti «Dınamomen» 2:2 esebinde tarqasty. Odan keıin óz alańynda 4 qazanda búgingi qarsylasy - Frantsııanyń «Renn» klýbyn 2:0 esebimen jeńse, syrtta 25 qazanda Chehııanyń «ıAblonets» klýbymen 1:1 esebimen teń oınady. Atalmysh «ıAblonetspen» 8 qarashada elorda tórinde qarymta oıyn ótkizip, bul kezdesýde elordalyq klýb 2:1 esebimen jeńiske jetti. Al 29 qarashada bizdiń fýtbolshylar Kıevtiń «Dınamosynan» 0:1 esebimen utylyp qaldy.

Eýropa lıgasynyń 1/16 fınaldyq oıynynyń jerebesi 17 jeltoqsanda tartylady. Jarystyń bul satysy 2019 jyldyń 14 jáne 21 aqpan kúnderi oınalady.