Astana forýmy: Qolaıly ınvestıtsııalyq klımat qalyptastyrýǵa kedergiler ataldy

ASTANA. QazAqparat – Astana halyqaralyq forýmy sheńberinde ótip jatqan Sheteldik ınvestorlar keńesinde Qazaqstan men Ortalyq Azııadaǵy «EY» kompanııasynyń basqarýshy seriktesi Erlan Dosymbekov eldegi ınvestıtsııalyq klımatty qolaıly etýge kedergi bolyp otyrǵan máselelerdi atady, dep habarlaıdy QazAqparat tilshisi.

«Biz eldegi ınvestıtsııalyq klımatty jaqsartý boıynsha birqatar máselelerdi anyqtadyq. Olardyń ishinde eksportqa shyǵatyn munaı men munaı ónimderine salynatyn kedendik salyq, Ekologııalyq kodeksti jetildirý jáne kadrlardyń biliktiligin arttyrý esebinen adamı kapıtaldy damytý baǵyttary bar.

Qurmetti Prezıdent, bul bizdiń keıingi 12 aıda atqarǵan jumystarymyzdyń qysqasha qorytyndysy. Buǵan deıin biz Qazaqstan tarapyna sheshýdi talap etetin máseleler boıynsha 8 nusqaýlyq bergen edik. Alaıda áli kúnge deıin bizdiń ótinishimiz oryndalmaı keledi. Sondyqtan men osy 8 nuqsaýlyqty atalǵan plenarlyq sessııanyń hattamasyna engizýdi suraımyn. Bul bizdiń bolashaq jumysymyz úshin asa mańyzdy», - dep usynys bildirdi Erlan Dosymbekov.

Buǵan deıin habarlaǵanymyzdaı, Prezıdent Qasym-Jomart Toqaev Astana halyqaralyq forýmy aıasynda ótip jatqan Sheteldik ınvestorlar keńesiniń otyrysyna qatysyp jatyr.