Astana forýmyna jumsalǵan 4,5 mlrd teńge keminde 4,5 mlrd dollar bop qaıtýy múmkin

ASTANA. KAZINFORM — Syrtqy ister mınıstriniń orynbasary Álibek Qýantyrov Astana halyqaralyq forýmynyń kýlýarynda is-sharany ótkizýge ketken shyǵyndar týraly pikir bildirdi.

— Mende forýmdy uıymdastyrýǵa jumsalatyn qarajattyń naqty sany belgisiz. Siz 4,5 mlrd teńge dep otyrsyz. Osy 4,5 mlrd teńge jaqyn arada 4,5 mlrd dollar bolyp qaıtýy múmkin. Árıne, bul múmkin. Men sizge eń keminde degen eseppen aıtyp otyrmyn. Meniń paıymymsha, odan da artyq ınvestıtsııa keledi, 7-10 mlrd dollar aralyǵynda ınvestıtsııa tartýǵa bolady, — dedi ol jýrnalıstiń suraǵyn bergen jaýabynda.

Onyń aıtýynsha, elge ІT-kompanııalardyń ınvestıtsııa qyzyǵýshylyǵy joǵary.

— Bastalyp jatqany búgin ǵana. Eki kúnniń ishinde biraz kezdesýler, talqylaýlar bolady. Tipti keıbiriniń nátıjesinde keıin naqty kelisimsharttarǵa qol qoıylýy múmkin. Forým aıasynda áriptestik ornatýy múmkin iri ІT-kompanııalar bar, — dedi Álibek Qýantyrov.

Aıta keteıik, elordada Memleket basshysy Qasym-Jomart Toqaevtyń qatysýymen Astana halyqaralyq forýmy ótip jatyr. 

Forýmǵa 7 000-nan astam qatysýshy tirkelgen. Eýropa, Ortalyq Azııa, Taıaý Shyǵys pen Afrıka elinen BUU, AAU, HKU jáne DZMU sııaqty jetekshi halyqaralyq uıymdardyń atynan 160-tan astam spıker shaqyrylǵan. Eki kún boıy olar túrli salanyń sarapshylarymen birlesip, memleketaralyq yntymaqtastyq modelin, jańa jahandyq áriptestik qurýdyń keleshegin talqylaıdy.

Buǵan deıin forýmnyń mártebeli meımandar qatarynda Rýanda Respýblıkasynyń Prezıdenti Pol Kagamen, Albanııa Premer-Mınıstri Edı Ramany, Horvatııa Respýblıkasynyń Premer-Mınıstri Andreı Plenkovıchti, Qatar Premer-Mınıstri — Syrtqy ister mınıstri sheıh Muhammed ben Abdýlrahman Ál Tánı bar ekeni habarlanǵan bolatyn.