«Astana» FK jas oıynshysy kómekke muqtaj

ASTANA. QazAqparat - «Astana» fýtbol ortalyǵynyń 17 jastaǵy tárbıelenýshisi Baqtııar Muhametqalıevke 2-shi deńgeıli osteogendy sarkoma (oń jaq asyq jiliktiń joǵarǵy bóliginiń qaterli isigi - S 40.2) atty qaýipti onkologııalyq dert dıagnozy qoıyldy, dep jazdy «Astana» FK resmı saıty.

Aýrýdan aıyǵý úshin Baqtııarǵa Germanııadaǵy onkologııalyq emhanalardyń birinde jyldam ota jasaý qajet. «Astana» FK óz túlegine barynsha kómek kórsetýde, degenmen ol qarjy azdyq etip jatyr. Baqtııardyń ata-anasy adam taǵdyryna nemquraıly qaramaıtyn qaıyrymdy jandardan kómek suraýda.

Baqtııarǵa qoldaý kórsetý maqsatynda «Astana» fýtbol klýby sports.kz respýblıkalyq sport portalymen birlesip, elektrondy qaıyrymdylyq aýktsıonyn ótkizýdi bastady. 24 qańtardan bastap sports.kz saıtynda Maksımovıch, Tvýması, Kanıas, Kabananga, Mýjıkov, Logvınenko syndy «Astana» oıynshylarynyń ataýly fırmalyq jeıdelerin satý boıynsha bássaýda júrgiziledi. Jeıdeniń bastapqy baǵasy - 5000 teńge. Satylǵan taýardy Qazaqstan boıynsha jetkizip berýdi «Astana» FK óz mindetine alady, al el aýmaǵynan tysqary jerge jetkizý máselesi bólek kelisiledi. Jeıdelerdi satýdan túsken barlyq qarajat Baqtııar Muhametqalıevtiń emine beriledi.