«Astana» FK óziniń fýtbol akademııasyna ıe emes
ASTANA. KAZINFORM - «Astana» FK óziniń fýtbol akademııasy men ınfraqurylymyna ıe emes. 6 jyl ishinde klýb fýtbol alańdary men úı-jaılardy jalǵa alýǵa 1,4 mlrd teńge jumsady. Bul týraly Antıkor men Týrızm jáne sport mınıstrligi birlesip jasaǵan sportty qarjylandyrý salasyndaǵy jemqorlyq táýekelderine syrtqy taldaýda aıtyldy.
"Qazirgi zamanǵy sport nysandarynyń jetispeýshiligi sportshylardy sapaly daıarlaý múmkindigin shekteıdi. Bul ásirese sporttyq nysandar jıi qol jetimdi emes nemese qanaǵattanarlyqsyz jaǵdaıda bolatyn aımaqtarda baıqalady.
Sonymen qatar, Qazaqstan Respýblıkasynyń dene shynyqtyrý men sportty damytýdyń 2023 – 2029 jyldarǵa arnalǵan tujyrymdamasy kádimgi jaıaý júrginshiler joldary men velosıped joldarynyń tapshylyǵyna baǵyttalǵan.
Al elimiz boıynsha 374,2 myń m2 jabyq sport ǵımarattarynyń, 376,4 myń m2 basseınderdiń tapshylyǵy baıqalady (Almaty, Astana, Túrkistan jáne Almaty oblystaryndaǵy eń úlken tapshylyq)" delingen Sybaılas jemqorlyqqa qarsy qyzmet málimetinde.
Sondaı-aq, tekserý barysynda vedomstvo myna jaǵdaıǵa asa mán beredi.
"Sport keshenderi men fýtbol akademııalaryn salýdyń ornyna sporttyq uıymdar legıonerlerdi ustaýǵa kóp aqsha jumsaǵan.
Mysaly, eń qymbat «Astana» FK (2018-2023 jyldary 50 mlrd teńge, quryltaıshysy – Sport jáne dene shynyqtyrý isteri komıtetiniń «Qazsportınvest» AQ «Týrızm jáne sport ındýstrııasyn qoldaý qory» korporatıvtik qory jáne UOK) óziniń fýtbol akademııasy men ınfraqurylymyna ıe emes.
6 jyl ishinde (2018-2023 jj.) klýb fýtbol alańdary men úı-jaılardy jalǵa alýǵa 1,4 mlrd teńge jumsady" delingen habarlamada.
