«Astana» FK oıyndarǵa bılet satýdyń ınnovatsııalyq júıesin engizdi
ASTANA. QazAqparat - «Astana» fýtbol klýby «Astana» Prezıdenttik klýbymen birlesip, klýbtyń oıyndaryna bılet satýdyń qolaıly júıesin ázirledi. Endi jankúıerler bıletterdi táýiligine 24 saǵat, álemniń kez kelgen núktesinen ǵalamtor, mobıldik qosymsha jáne búkil respýblıka boıynsha ornatylǵan termınaldar arqyly ala alady. Bul týraly «Astana» fýtbol klýby baspasóz qyzmetinen habarlandy.
«Astana» klýby buqaralyq-mádenı is-sharalarǵa bılet satýmen aınalysatyn «Tıketon» jelisimen seriktestik ornatqan bolatyn. Osyǵan baılanysty, fýtbol maýsymynyń alǵashqy oıyndarynan bastap, fýtbol súıer qaýym úshin bıletter on-laın rejıminde «Tıketon» (ticketon.kz saıty nemese mobıldik qosymshalary) arqyly, klýbtyń saıtynda (fca.kz), sonymen qatar «Tıketon» seriktesteri kómegimen - elimizdiń eń belgili sporttyq jarshylary sports.kz jáne vesti.kz, nur.kz, zakon.kz, jam.kz, afisha.kz, yvision.kz jáne t.b. saıttarda, Qazaqstannyń eń iri oıyn-saýyq ortalyqtarynda, Qiwi jáne Kassa24 termınaldary arqyly satylady», - delingen baspasóz baıanynda.
Bılet satyp alý úshin, birinshiden, oıyndy jáne «Astana Arena» stadıonynyń kez kelgen sektorynda qalaıtyn oryndy tańdaý kerek. Tólem jasalǵan soń bılettiń ózi uıaly telefonǵa jáne elektrondyq poshtaǵa joldanady. Stadıonǵa ótý úshin jankúıer qaǵazǵa basylǵan elektrondyq bıletti kórsetedi.
Fýtbol klýbynyń ákimshiligi atap ótkendeı, oıyndarǵa bıletterdi on-laın rejıminde ǵana emes, «Astana Arena» stadıonynyń kassalarynda oıyn ótetin kúni alýǵa bolady. Bılet aqysy sektorǵa baılanysty 200 teńgeden bastap 2000 teńgege deıin, al 7 jasqa deıingi balalar úshin kirý tegin. Sonymen qatar 7-16 jas aralyǵyndaǵy jetkinshekter, stýdentter men zeınetkerler úshin 50% mólsherinde jeńildik bar (zeınetkerlik kýálik, týý týraly kýálik, stýdenttik bılet bolsa).
«Buǵan qosa, maýsymdyq abonementter de satýǵa shyǵarylady, onyń quny 3500 teńgeden bastap 34000 teńgege deıingi aralyqty qamtıdy. Abonement alǵan adam Premer Lıganyń 16 oıynyn, Qazaqstan Kýbogynyń barlyq jergilikti oıyndaryn, sondaı-aq Chempıondar Lıgasynyń kvalıfıkatsııalyq raýndtarynyń 2 oıynyn tamashalaı alady», - delingen baspasóz baıanynda.
