«Astana» FK bas bapkeri Qazaqstanda - birinshi, óz elinde - ekinshi «úzdik bapker»
ASTANA. QazAqparat - «Astana» fýtbol klýbynyń bas bapkeri Stanımır Stoılov «2016 jylǵy Bolgarııanyń eń úzdik bapkeri» saýalnamasynda ekinshi orynǵa ıe boldy.
Al jeltoqsannyń basynda Qazaqstanda teńdessiz tanylǵan bolatyn.
Qazaqstan premer-lıgasynyń 2016 jylǵy eń úzdik bapkeri osydan bir aıdan astam ýaqyt buryn anyqtalǵan bolatyn. Oǵan premer-lıgamyzdaǵy klýbtardyń basshylary, bas bapkerleri jáne kapıtandary qatysyp (barlyǵy - 36 adam), daýys bergen.
Atalǵan saýalnama qorytyndysy boıynsha «Astana» klýbynyń bas bapkeri, Bolgarııa mamany Stanımır Stoılov teńdessiz tanylǵan bolatyn. Ol 83 upaımen ózgelerden qara úzip ketken-di. Mysaly, ekinshi orynǵa ıe bolǵan onyń otandasy Dımıtar Dımıtrov nebári 34 upaı enshilegen-di.
«Qazaqstan premer-lıgasynyń 2016 jylǵy eń úzdik bapkeri» saýalnamasynda úshinshi oryndy Kahaber Tshadadze (30 upaı), tórtinshi oryndy Vladımır Mýhanov (20 upaı), tek besinshi-altynshy oryndardy óz mamandarymyz Talǵat Baısýfınov pen Vahıd Masýdov (10 upaıdan) enshilegen bolatyn.
Osy rette aıta keteıik, elimizdiń Kásipqoı fýtbol lıgasy júrgizgen saýalnamada Stanımır Stoılovty 23 respondent birinshi orynǵa, beseýi ekinshi, al tórteýi úshinshi orynǵa qoıǵan bolatyn. Sonda 23h3 + 5h2 +4h1 = 83 upaı bolǵan.
Bolgarııa fýtbol federatsııasynyń málimetinshe, bul elde úzdikterdi anyqtaýǵa 50 elektrondy jáne baspasóz basylymynan 101 jýrnalıst qatysyp, daýys bergen. Munda da birinshi orynǵa - úsh, ekinshi orynǵa - eki, al úshinshi orynǵa bir upaı berilgen.
Sóıtip, «Bolgarııanyń 2016 jylǵy eń úzdik bapkeri» nomınatsııasynda «Lýdogorets» klýbynyń bas bapkeri Georgı Dermendjıev úzdik shyqqan. «Astanamen» Qazaqstanda "altyn dýbl" jasaǵan (chempıonatty da, kýbokty da jeńip alǵan) Stanımır Stoılov ekinshi orynǵa ıe bolsa, TsSKA (Sofııa) komandasyn jattyqtyratyn Hrısto ıAnev úshinshi bolǵan.
Georgı Dermendjıevtiń úzdik tanylýynyń jóni bar. Óıtkeni «Lýdogorets» klýby Chempıondar lıgasynyń toptyq kezeńine shyǵyp, úsh upaımen «A» tobynda úshinshi orynǵa ıe boldy. «Arsenal» men «Parı Sen-Jermen» aldyn orap, «Bazel» sońǵy orynǵa taban tiredi.
Osylaı, Chempıondar lıgasynda úshinshi oryn alǵanynyń arqasynda Georgı Dermendjıevtiń komandasy Eýrokýbok dodasyn Eýropa lıgasynda jalǵastyrý quqyǵyna ıe boldy. Endi kóktemde, 1/16-fınalynda «Kopengagen» (Danııa) klýbymen kezdesedi.
Derekkóz: Astana fýtbol federatsııasy
