Astana Finance Days konferentsııasy bastaldy
ASTANA. KAZINFORM – Astanada jyl saıynǵy dástúrli «Astana Finance Days 2024» bastaldy. Bıylǵy basqosý «Innovatsııa. Investıtsııa. Serpin» taqyrybynda ótedi, onda qarjy sektoryndaǵy ozyq tehnologııalar, Qazaqstannyń ınvestıtsııalyq múmkindikteri jáne qarjynyń ornyqty damýǵa jáne qoǵamdaǵy oń ózgeristerge áseri talqylanbaq.
«Qazaqstan halyqaralyq ınvestıtsııalardy tartý úshin zor áleýetke ıe, biraq álemdik qarjy naryǵynda básekelestik kúnnen-kúnge kúsheıip jatqanda ınnovatsııalyq tásilder men sheshimderdi engizý qajet. AHQO Qazaqstannyń ınfraqurylymdyq jobalaryna ınvestıtsııalar tartýǵa jáne qarjy salasynda jańa ónimder engizýge járdemdesetin tıimdi alańǵa aınalyp úlgerdi. Astana Finance Days – elimiz úshin ǵana emes, qarjy áleminiń jahandyq qoǵamdastyǵy úshin de ózekti taqyryptardy talqylaý úshin memlekettik organdardyń, bıznestiń jáne sarapshylyq qoǵamdastyq ókilderin jınaıtyn óńirdegi biregeı alań. Bıylǵy konferentsııada ózekti syn-tegeýirinderdi jáne eldiń qarjy sektorynyń uzaq merzimdi ósýi men damýyna yqpal etetin jańa strategııalar izdeýdi talqylaımyz», – dedi AHQO basqarýshysy Renat Bekturov.
Konferentsııanyń birinshi kúni óńirlik ınfraqurylymǵa ınvestıtsııalardyń bolashaǵyn qalyptastyrý, energetıka men qurylysty damytý máseleleri, Ortalyq Azııadaǵy ornyqty qarjylandyrýdyń jaı-kúıi, balamaly ınvestıtsııalar salasyndaǵy ınnovatsııalyq-ınvestıtsııalyq strategııalar, elektromobılge kóshýge qolaıly qarjylyq ortany qalyptastyrý, shyǵarmashylyq ındýstrııalardaǵy daryndy jandarǵa ınvestıtsııalar, adamı kapıtaldy damytýdaǵy jasandy ıntellekttiń saldary, táýekelderi men múmkindikteri taqyryptarynda paneldik sessııalar ótedi.
Budan basqa, AHQO kreatıvti ındýstrııany qoldaýda mańyzdy qadam jasaýda. Búgin «Venchýrlyq stýdııalar týraly» AHQO qaǵıdalary qabyldanady. Bul qadam venchýrlyq bıznesti retteý úshin quqyqtyq baza jasaıdy, ol ınnovatsııalyq startaptardyń ósýine jáne AHQO sheńberinde olardyń aýqymyn odan ári ulǵaıtýǵa járdemdesedi.
Bul qaǵıdalar jańa bıznes-ıdeıalardy ınkýbatsııalaýǵa, kásipkerlerge demeýshilik jasaýǵa jáne jańa bıznes aýqymyn keńeıtý shyǵyndaryn azaıtýǵa múmkindik beretin naqty jedel sharalardy engizý arqyly venture studio modeli sheńberinde bıznes júrgizýdi jeńildetedi.
Osy oraıda AHQO-da alǵashqy venchýrlik stýdııa qurylady. Bul startaptar men kásipkerler úshin jańa múmkindikter ashatyn Qazaqstandaǵy venchýrlyq stýdııalardy damytýdaǵy mańyzdy qadam bolmaq.
Oǵan qosa, Qazaqstanda alǵash ret AHQO soty men Halyqaralyq tórelik ortalyǵy «HTO: tóreliktegi áıelder kúni» sharasyn ótkizedi. Bul halyqaralyq tóreliktegi alýandylyq pen ınklıýzıvtilik máselelerine arnalady. Álemniń túkpir-túkpirinen kelgen jetekshi áıel-tóreshiler, ǵalymdar men zańgerler tájirıbe almasý jáne halyqaralyq tórelik salasyndaǵy áıelderdiń aldynda turǵan ózekti problemalardy talqylaý úshin bas qosady. Atap aıtqanda, energetıka men qurylys sektorlaryndaǵy daýlardy sheshý, tórelik ótkizýge arnalǵan strategııalyq oryn tańdaý taqyryptary qamtylady.
Aıta keteıik, Astana Finance Days konferentsııasy 2018 jyldan beri qarjy salasynyń jetekshi sarapshylaryn, Eýrazııa óńiriniń ınvestorlary men bıznes-kóshbasshylaryn biriktiretin basty platforma retinde qyzmet etip keledi. Jyl saıyn bul sharaǵa 70-ten astam elden 3 myńnan astam adam qatysady.
