Astana Finance Days: Qazaqstanda kásipkerler kómirtek birlikterin bırja arqyly sata alady
ASTANA. KAZINFORM – Qazaqstanda ekologııalyq jobalardy júzege asyratyn kásipkerlerge kómirtek birlikterin bırja arqyly saýdalaýǵa múmkindik beriledi. Bul týraly Astana Finance Days aıasynda «Astana» halyqaralyq qarjy ortalyǵy ákimshiliginiń ónimder jónindegi bas dırektory Janbolat Kákishev aıtty.
Onyń sózinshe, AHQO kómirtek birlikteri salasyndaǵy halyqaralyq Verra standartymen kelisim jasasýdy josparlap otyr.
– Biz Verra standartymen kelisimge qol qoıamyz. Bul bizge kómirtek birlikterin saýdalaýǵa múmkindik beredi. Verra – osy saladaǵy álemdegi eń iri standarttardyń biri. Ony bizdiń bırjaǵa engizemiz. Sonyń arqasynda ekologııalyq jobalarmen aınalysatyn kásipkerler kómirtek birlikterin tikeleı bizdiń bırja alańynda saýdalaı alady, - dedi Janbolat Kákishev.
Onyń aıtýynsha, atalǵan kelisimge Astana Finance Days aıasynda qol qoıylmaqshy.
AHQO ókili forýmda jańa kelisimder jasaý úshin arnaıy alań qarastyrylǵanyn da atap ótti. Munda naryq qatysýshylary óz jobalary boıynsha kelisimderge qol qoıa alady.
Aıta keteıik, búgin elordada Astana Finance Days forýmy ótip jatyr. Bıylǵy is-sharaǵa álemniń 90 elinen 8 myńǵa jýyq qatysýshy tirkelgen. Forým aıasynda Qazaqstannyń taý-ken jáne kreatıvti ındýstrııa salasyndaǵy jobalary sheteldik ınvestorlarǵa tanystyrylyp jatyr.
