Astana Finance Days: Qazaqstan qandaı jobalarǵa sheteldik ınvestıtsııa tartpaq
ASTANA. KAZINFORM — Astana Finance Days aıasynda Qazaqstannyń taý-ken jáne kreatıvti ındýstrııa salasyndaǵy jobalary sheteldik ınvestorlarǵa tanystyrylyp jatyr.
Bul týraly «Astana» halyqaralyq qarjy ortalyǵy ákimshiliginiń ónimder jónindegi bas dırektory Janbolat Kákishev ınvestorlarǵa qandaı jobalar usynylyp jatqanyn aıtyp berdi.
Onyń aıtýynsha, AHQO taý-ken salasynda jumysyn endi bastaǵan kompanııalarǵa ınvestıtsııa tartýǵa baǵyttalǵan Junior Mining Platform baǵdarlamasyn iske asyrýdy qolǵa alyp otyr.
— Mundaı kompanııalarǵa qarjy salýǵa daıyn ınvestorlar Qazaqstanda ǵana emes, álemde de az. Óıtkeni bul salaǵa ınvestıtsııa salýdyń táýekeli joǵary. Máselen, 100 jobanyń shamamen 10-y ǵana sátti bolýy múmkin. Sondyqtan mundaı táýekelge kez kelgen ınvestor bara bermeıdi, — dedi Janbolat Kákishev.
Baǵdarlama aıasynda buǵan deıin qazaqstandyq kásipkerlerden taý-ken salasyndaǵy jobalar qabyldanyp, olardy arnaıy jumys toby qarastyrǵan. Spıkerdiń málimetinshe, sonyń nátıjesinde 23 joba iriktelip alyndy.
— Endi Astana Finance Days aıasynda osy jobalardyń avtorlary óz usynystaryn sheteldik ınvestorlarǵa tikeleı tanystyryp jatyr. Forýmǵa osy baǵyttaǵy jobalardy qarastyrý úshin Oman, Ulybrıtanııa jáne Qytaıdan ınvestorlar keldi. Bul baǵdarlamany turaqty túrde júrgizetin bolsaq, onyń naqty nátıjesin kóremiz dep oılaımyn, — dedi ol.
Forýmda kreatıvti ındýstrııa salasyndaǵy qazaqstandyq jobalar da ınvestorlarǵa usynylady. Bul baǵyttaǵy jobalardy da arnaıy jumys toby aldyn ala iriktep alǵan.
Janbolat Kákishevtiń sózinshe, iriktelgen 23 jobanyń 70 paıyzy GameDev, ıaǵnı kompıýterlik oıyn ázirleý salasyna qatysty.
— Biz kıno nemese mýzyka salasyndaǵy jobalar kóbirek bolady dep oılaǵan edik. Biraq oıyn ázirleýge qatysty jobalar kóp bolyp shyqty. Bul bizdiń jastardyń jańa baǵyttarǵa bet buryp jatqanyn kórsetedi, — dedi AHQO ókili.
Sheteldik ınvestorlar taý-ken jáne kreatıvti ındýstrııadan bólek, Qazaqstannyń kólik jáne logıstıka salasyndaǵy jobalaryna da nazar aýdaryp otyr. Buǵan Orta dálizdiń damýy jáne osy baǵytta júk tasymalynyń artýy áser etken.
Janbolat Kákishevtiń aıtýynsha, ár ınvestor óz baǵytyna saı jobalardy qarastyrady. Máselen, taý-ken salasynda jumys isteıtin enshiles kompanııalary bar iri qorlar Qazaqstandaǵy osy salaǵa qatysty jobalarǵa qyzyǵýshylyq tanytyp otyr.
Sondaı-aq Astana Finance Days aıasynda qazaqstandyq kásipkerler men sheteldik ınvestorlardyń tikeleı kezdesip, jańa jobalar boıynsha kelisim jasaýyna arnalǵan arnaıy alań jumys isteıdi.
Eske salaıyq, buǵan deıin elordada ótip jatqan Astana Finance Days forýmyna 8 myńǵa jýyq qatysýshy tirkelgeni habarlandy.
