Astana Finance Days qarjy konferentsııasynda ne talqylandy
NUR-SULTAN. QazAqparat - Elordada 1-4 shilde kúnderi dástúrli Astana Finance Days mamandandyrylǵan qarjy konferentsııasy ótti. Oǵan álemdik sarapshylar, saıasatkerler, bıznes ókilderi jáne «Astana» halyqaralyq qarjy ortalyǵyna tirkelgen kompanııa ókilderi keldi. Olar sońǵy on jylda bolǵan ózgeristerge taldaý jasap, jańa tásilder men joldardy talqylady.
QazAqparat agenttigi mamandandyrylǵan konferentsııada talqylanǵan eń ózekti taqyryptardy usynady.
«Astana» qarjy ortalyǵy IPO-ǵa shyǵýǵa kómektesedi
Elordada Astana Finance Days forýmy aıasynda AHQO Bıýrosynda alǵash ret kompanııalardyń IPO-ǵa shyǵý joldary týraly praktıkalyq semınarlar ótti. Jıyn qorytyndysy boıynsha úzdik kompanııalar iriktelip, AHQO olardyń is júzinde IPO-ǵa shyǵýyna kómektesedi. Tájirıbelik semınarda túrli halyqaralyq ınstıtýt ókilderi kompanııalarǵa býhgalterlik eseptiń mańyzdylyǵyn, durys qarjy úlgisi men korporatıvti basqarý joldaryn túsindirdi. Atap aıtqanda, Álemdik býhgalterler men aýdıtorlar qaýymdastyǵynyń (ASSA) óńirlik jetekshisi Vıkas Aggarval shaǵyn jáne orta bıznesti damytý joldary týraly keńes berdi
«Álemdik qarjylyq daǵdarysta shaǵyn jáne orta bıznes turaqtap qaldy jáne jańa jumys ornyn ashty. ShOB damyǵan elderde ǵana emes, damýshy elderde de ekonomıkanyń joǵary úlesin ıelenip otyr. Naryqta ozyq bolý úshin shaǵyn jáne orta bıznes jańa tehnologııalar men ónimderge, jańa qyzmetterge qarajat jumsaǵan jón», - dedi Vıkas Aggarval.
Bilim berý salasyndaǵy tóńkeris
Sonymen birge, Astana Finance Days aıasynda elordada tuńǵysh ret EdTech-2019 bilim berý tehnologııalary forýmy ótti. Sharaǵa kelgen Coursera, EdCrunch, Google,Microsoft, ACCA, GARP syndy halyqaralyq kompanııa ókilderi bilim berý tehnologııalaryndaǵy ózekti máselelerdi talqylady. Jıynnyń arnaıy qonaǵy, «Fung Group» kompanııalar tobynyń basshysy Vıktor Fang bilim berý salasynda tóńkeris jasaıtyn ýaqyt bolǵanyn aıtty. «McKenzie» júrgizgen zertteýge sáıkes, álem boıynsha jumys oryndarynyń jartysyna jýyǵyn avtomattandyrýǵa bolady. HHІ ǵasyrdyń ortasynda jumysshy mamandyqtardyń teń jartysy almastyrylady. Avtomattandyrý álemde 400 mln adamǵa yqpal etedi.
«Menińshe, jańa tehnologııalar bilim berý salasyna tóńkeris jasaıdy. Bul sátte jumyssyzdyqtan arylý úshin mamandar jańa qabiletterdi úırenýi qajet», - dedi Vıktor Fang «Tsıfrlyq dáýirdegi bilim berý» sessııasynda.
Qarjy salasy jańa tehnologııalardy nege qabyldamaıdy?
Astana finance days aıasynda «Astana» halyqaralyq qarjy ortalyǵynda alǵashqy fınteh-sammıt uıymdastyryldy. Onda qarjy salasyndaǵy joǵalyp bara jatqan mamandyqtar, damýdyń jańa kezeńi, qarjylyq qyzmet kórsetýdegi qıyndyqtar men jańa álemdik úrdister talqyǵa salyndy.
«Tórtinshi óndiristik revolıýtsııa bizdi damýdyń jańa kezeńine shyǵardy. Qazirgi ýaqytta biz jasandy ıntellekt, blokcheın, ınternet-ónimder týraly aıta bastadyq. Biraq qarjy salasyndaǵy ınnovatsııalyq jańalyqtar óte baıaý júrýde. Sebebi, biz adamdardyń aqshasymen jumys isteımiz. Kez kelgen tekserilmegen qadam aqshanyń joǵalýyna ákep soǵady. Sondyqtan qarjylyq ınstıtýttar konvervanttyq kózqarasty ustanady. Olar óz ınvestorlary men aqshalaı qarajatyn saqtaǵysy keledi», - dep túsindirdi FinTech4Good dırektory Sıaochen Jeng.
Sonymen birge, sarapshylar qarjy salasyndaǵy tsıfrlandyrý, QR-tólemder, onlaın-kassalardyń artyqshylyqtary men kemshilikteri týraly pikir bildirdi.
Halal-ındýstrııaǵa basa mán beriledi
Qazaqstan óńirdegi ıslamdyq qarjylandyrýdy damytý úshin tartymdy platforma bolyp sanalady jáne ıslamdyq qarjylandyrý - AHQO strategııalyq mindetteriniń biri. Osy oraıda AHQO-da Islam qarjylandyrýymen, halal-ındýstrııamen jáne ınvestıtsııa tartýmen aınalysatyn qaýymdastyq qurylyp jatyr.
«Islamdyq qarjy júıesi ekonomıkanyń naqty sektorymen tyǵyz baılanysty. Onyń quraldaryn paıdalanýda belgili bir shekteýler bar. Máselen, kásipkerdiń qumar oıyn uıymdastyrýyna, alkogol óndirýine, ústeme ósimge tyıym salynǵan. Sondyqtan ıslamdyq qarjylandyrýdaǵy kásip halal bolǵany jón. Halal bıznesti azyq-túlik ındýstrııasymen ǵana baılanystyryp úırengenbiz. Al shyn máninde farmatsevtıka, týrızm syndy aıasy keń. Sondyqtan, halal-ındýstrııany damytsaq, ınvestıtsııa da kóptep túser edi», - dedi «Astana» halyqaralyq qarjy ortalyǵy Islamdyq qarjy men bıznes habynyń basshysy Álibek Nurbekov "QazAqparat" tilshisine bergen suhbatynda.
Jańa uıymdar
Astana Finance Days aıasynda Astana halyqaralyq qarjy ortalyǵynda birneshe ǵımarattardyń tusaýy kesildi. 1 shildede QR Prezıdentiniń qatysýymen AHQO soty men Halyqaralyq tórelik ortalyǵy ashyldy. AHQO soty aǵylshyn zańyna negizdeledi jáne qarjylyq ortalyqtyń konstıtýtsııalyq zańyna súıenedi. Ol Qazaqstannyń sot júıesinen táýelsiz jáne azamattyq, kommertsııalyq shaǵymdarmen ǵana jumys isteıdi.
Sot júıesine qatysty taǵy bir qyzyqty joba - AIFC Law Pro Bono dep atalady. «Pro Bono» termıni «qoǵam ıgiligi úshin» degen maǵyna beredi. ıAǵnı, zańger jaldaýǵa qarajaty jetpegen adamdarǵa tegin sapaly zańgerlik qyzmet kórsetiledi.
AHQO aıasynda ashylǵan Úzdiksiz kásibı damý bıýrosy halyqaralyq jáne jahandyq deńgeıde tanylyp úlgerdi. Bul ortalyq zamanaýı áleýmettik bilikter boıynsha maman daıarlaýmen aınalysady. Oqytý onlaın jáne offlaın rejımde júrgiziletindikten, árbir adamnyń sapaly bilim alyp, ózin-ózi damytýyna múmkindik týyp otyr.
