Astana fılarmonııasynda uly Abaıdyń qara sózderi boıynsha ádebı-mýzykalyq kesh ótedi
ASTANA. 6 aqpan. QazAqparat - 7 aqpanda Astana memlekettik fılarmonııasynyń qazaq halyq aspaptary Kongress-Holl saraıynda uly Abaıdyń qara sózderi boıynsha ádebı-mýzykalyq kesh ótkizedi.
Bul týraly fılarmonııanyń baspasóz qyzmetinen habarlady.
Zaman ózgerse de, jańa qundylyqtar paıda bolsa da, biz Abaıdy izdeımiz. Artyna ólmeıtuǵyn sóz qaldyrǵan ǵulamanyń bile bilgenge aıtary - telegeı teńiz.
Kesh barysynda fılarmonııada qyzmet etetin kásibı ártister, sahna júrgizýshileri Syrym Qashqabaev, Ádil Ahmetov, Janna Áýbákirova, Jansulý Júzbaeva, qazaq halyq aspaptar orkestri, QR halyq ártisi Qaırat Baıbosynov, QR eńbek sińirgen ártisi Ǵalııa Baıǵazınova, QR eńbek sińirgen qaıratkeri Qııaqbaı Asambaev óner kórsetedi.
Bul keshtiń basqa kontsertterden aıyrmashylyǵy - fılarmonııanyń mýzykalyq-shyǵarmashylyq bóliminde qyzmet etetin teatr ártisteri men sahna júrgizýshileri Abaıdyń qara sózderin oqysa, mýzykanttar men ánshiler halyqqa keńinen tanymal Abaı ánderin oryndaıdy. Osylaısha elordalyq fılarmonııa qaramaǵyndaǵy birneshe shyǵarmashylyq ujymdardyń basyn qosyp, án men jyrdy, qara sózdi ushtastyrý arqyly halyqqa Abaı murasyn nasıhattaýdy maqsat etti. Buǵan deıin 2012 jyldyń 23 qazanynda uıymdastyrylǵan bul formattaǵy ıgi shara - R.Bredberıdiń «Vıno ız odývanchıkov» shyǵarmasynyń jelisi boıynsha qoıylǵan sentımentaldy esse kórermenderdiń ystyq yqylasyna bólengen edi.
Qazaq halyq aspaptary orkestri - Astana qalasy ákimdigi Memlekettik fılarmonııasynyń alǵashqy kásibı shyǵarmashylyq ujymy (1997 jyly qurylǵan).
Orkestrdiń quramyna Memlekettik «Daryn» jastar syılyǵynyń ıegeri Anar Muzdahanova, halyqaralyq jáne respýblıkalyq konkýrstardyń laýreattary Botagóz Táshimova, Janar Júsipova, Janar Qasymova, Almat Saıjan, Sáttibek Baıahov, respýblıkamyzdyń áıgili mýzykanttary, Qurmanǵazy atyndaǵy Ulttyq Konservatorııanyń jáne Qazaq Ulttyq Óner Ýnıversıtetiniń daryndy túlekteri kiredi.
On bes jyl ishinde orkestr úlken tabystarǵa jetti. Búgingi kúnde ujymnyń repertýarynda qazaqtyń halyq kompozıtorlary Yqylastyń, Súgirdiń, Qorqyttyń, Qurmanǵazynyń, Dáýletkereıdiń, D.Nurpeıisovanyń, Túrkeshtiń, Táttimbettiń, Qazaqstan kompozıtorlary Ahmet Jubanovtyń, E.Brýsılovskıdyń, Muqan Tólebaevtyń, Nurǵısa Tilendıevtiń, Latıf Hamıdıdiń, Kenjebek Kúmisbekovtiń, Ǵazıza Jubanovanyń jáne t.b., orys, shetel kompozıtorlarynyń shyǵarmalarynan M.Glınkanyń, P.Chaıkovskııdiń, G.Svırıdovtyń, E.Doganyń, qazirgi zaman jáne shetel avtorlarynan: V.Motsarttyń, I.Shtraýstyń, I.Bramstyń, D.Pýchınıdiń, D.Verdıdiń shyǵarmalary bar.
Astanalyq orkestrmen áıgili dırıjerler KSRO Halyq ártisi, Memlekettik syılyqtyń ıegeri, professor - Shamǵon Qajǵalıev, Reseı Federatsııasynyń, Qazaqstan Respýblıkasynyń jáne Tatarstannyń halyq ártisi, professor - Fýat Mansurov, Ózbekstannyń halyq ártisi, T.Jamılov atyndaǵy Memlekettik orkestrdiń kórkemdik jetekshisi, professor - Farýh Sadyqov, QR Eńbek sińirgen ártisteri - Jalǵasbek Begendikov, Esirkep Joldasov sııaqty óner sańlaqtarymen kontsertter qoıdy.
Qazaq halyq aspaptary orkestriniń kórkemdik jetekshisi jáne bas dırıjery, QR eńbek sińirgen qaıratkeri, QR bilim berý isiniń «Qurmetti qyzmetkeri», QR Kompozıtorlar Odaǵynyń múshesi, professor Aıtqalı Jaıymov.
«Mádenıet qaıratkeri» Nurlan Bekenov osy ujymda dırıjerlik qyzmet atqarady.
