Astana fılarmonııasy sımfonııalyq orkestriniń XIV kontsert maýsymy ashylady

 Bul týraly Astana fılarmonııasynyń baspasóz qyzmeti habarlady.

Orkestrdiń kórkemdik jetekshisi jáne bas dırıjeri - QR eńbek sińirgen qaıratkeri Abzal Muhıtdınov.
Baǵdarlamada T.Qyshqashbaevtyń «Shattyqty elim» sımfonııalyq poemasy, K.Sen-Sanstyń «Organdyq sımfonııasy», S.Prokofevtiń «Orkestrmen fortepıano úshin №1 kontserti» oryndalady.

Solıster - organshy, organdyq mýzykadan halyqaralyq konkýrstardyń laýreaty Saltanat Ábilhanova jáne pıanınoshy, professorlar Turar Ábilqaıyrovtyń, Altaı Qusaıynovtyń (Qazaqstan) jáne Tamas Ýngardyń (AQSh) shákirti, respýblıkalyq jáne halyqaralyq konkýrstardyń laýreaty, jas oryndaýshylardyń HH respýblıkalyq baıqaýy birinshi syılyǵynyń,  "Shabyt-Inspiration" pıanıster halyqaralyq baıqaýynyń (Astana qalasy) birinshi syılyǵynyń ıegeri, "Shabyt-Inspiration" konkýrsynyń kameralyq mýzyka atalymynda Gran-Prı ıegeri Dına Dúısen. Ol sondaı-aq Senıgalııadaǵy (Italııa) halyqaralyq pıanıster ekonkýrsynyń úshinshi júldesin de ıelengen.

Dına jekeleı de, kameralyq janrda da  "Duissen Duo" dýety quramynda TMD, Eýroodaq elderinde, Ulybrıtanııada, Azııa men AQSh-ta, Vena konservatorııasynda jáne basqa da bedeldi zaldarda, kóptegen elder prezıdentteri aldynda óner kórsetti. Qazaq ulttyq mýzyka akademııasyn úzdik bitirip, AQSh-tyń Fort Ýert qalasynda aspırantýrada oqýǵa stıpendııaǵa ıe bolyp, ony 2008 jyly aıaqtady. Sol jyly Dına Londondaǵy Koroldik Mýzyka Akademııasyna túsip, oqýyn jalǵastyrýda.   

Orkestr óziniń jańa kontserttik maýsymyn bastaıdy. Alda jańa kontsertter men orasan zor jobalar tur. Eske sala keteıik, 24 qyrkúıekte «Accordi di Astana» mýzykalyq festıvaliniń tanystyrylymynda orkestr qazirgi zamandaǵy kórnekti pıanıst Denıs Matsýevpen birge P.I.Chaıkovskııdiń Birinshi fortepıanolyq kontsertin oryndady.