Astana Eýropanyń qoljetimdi týrızm jelisine resmı túrde qosyldy
ASTANA. KAZINFORM — Astana resmı túrde Eýropalyq qoljetimdi týrızm jelisine — European Network for Accessible Tourism (ENAT) qosyldy. Osylaısha TMD elderi arasyndaǵy alǵashqy qala atandy, dep habarlaıdy qala ákimdiginiń resmı saıty.
Bul mártebe Astananyń múgedektigi bar turǵyndar men qonaqtarǵa arnalǵan ınklıýzıvti orta qurýǵa degen umtylysyn rastaıdy.
— Astanada shamamen 43 myń adamnyń múgedektigi bar: onyń 31 myńy — eresekter, 12 myńy — balalar. Bul kórsetkishter júıeli ózgeristerge negiz boldy. Qala jańa tehnologııalar, bilim berý jáne áleýmettik jaýapkershilikti biriktire otyryp, ınklıýzıvtiliktiń standarttaryn qalyptastyryp jatyr, — dedi «Eýrazııalyq ınklıýzıvti qoǵamdy damytý qaýymdastyǵy» QB tóraǵasy Vıacheslav Pak.
Qalada erkin qozǵalýdy qamtamasyz etý — ómir sapasynyń basty kórsetkishteriniń biri. 2014 jyldan beri qoǵamdyq kólik júrgizýshilerin múgedektigi bar jolaýshylardy qyzmet kórsetý boıynsha halyqaralyq standarttarmen oqytý júrgizilip keledi. Nátıjesinde qoǵamdyq kóliktiń 92,6%-y (1750 kóliktiń 1600-den astamy) pandýstarmen jabdyqtalǵan.
Mádenıet árkim úshin qoljetimdi bolýy tıis. Osy qaǵıdat Astanada ınklıýzıvti orta jasalǵan mádenı mekemelerde basshylyqqa alynǵan. Qalalyq jáne ulttyq mýzeılerge aýdıogıdter, sensorlyq ekrandar, ymdaý tilindegi kórsetkishter jáne Braıl shrıfimen eksponattardyń sıpattamalary ornatyldy. Mýzeı personaly arnaıy daıarlyqtan ótti.
Elordadaǵy «Astana Opera» teatry da ınklıýzıvtilik standarttaryna saı jobalanǵan: pandýstar, arnaıy lıfter, keńeıtilgen esik, múgedekterge arnalǵan aımaqtar.
Sonymen qatar, qalada múgedektigi bar adamdarǵa arnalǵan arnaıy týrıstik marshrýttar jasalǵan. Olar Nurjol jelekjoly, Botanıkalyq baq, Táýelsizdik alańy, eski qala jáne Esil ózeniniń boıy qamtylǵan.
Medıtsınalyq týrızm de damyp keledi: Qazaqstanda 25 klınıka halyqaralyq komıssııa akkredıtatsııasynan ótken, onyń 7-eýi — Astanada. Aıryqsha nazar aýdaratyn — Ulttyq balalar reabılıtatsııalyq ortalyǵy, munda jyl saıyn 4200 balaǵa kómek kórsetiledi.
Qala týrızm salasynda qyzmet kórsetetin 200 qyzmetkerdi ınklıýzıvti standarttar boıynsha oqytty, jańa jobalar múgedektigi bar adamdarmen birlesip iske asyrylyp jatyr. Astana atalǵan qoljetimdilikti — erekshelik emes, ár adam úshin tolyqqandy ómir súrý quqyǵy retinde kórsetip otyr.
Eýropa Odaǵynda 80 mıllıonǵa jýyq múgedektigi bar adam ómir súredi, olardyń 70%-dan astamy belsendi saıahattaıdy. Astananyń ENAT jelisine qosylýy áleýmettik baǵyttalǵan týrızmdi damytýǵa, halyqaralyq yntymaqtastyqty keńeıtýge jol ashady.
Budan buryn Vogue Qazaqstandy 2025 jylǵy eń úzdik 14 baǵytqa qosqanyn jazǵan edik.