«Astana» Eýropa lıgasynyń toptyq kezeńine joldama aldy
ASTANA. QazAqparat - Búgin «Astana Arena» stadıonynda elordalyq ujym Eýropa lıgasy irikteý kezeńiniń pleı-off raýndy aıasynda Kıprdiń APOEL komandasyn qabyldady, dep habarlaıdy QazAqparat tilshisi.
Nıkosııada ótken alǵashqy kezdesýdegi jeńilisten keıin, Grıgorıı Babaıan shákirtteri búgin qalaıda jeńiske jetýi tıis bolǵany ózdiginen túsinikti. Degenmen elordalyq ujym á degennen shabýylǵa lap qoıǵan joq. Esesine kıprlikterdiń oıyny birshama shıraqtaý kórindi.
Oıynda «Astana» esep ashty. 15-mınýtta qaýipti shabýyldardyń birinde aıyp alańynyń ishinde qonaqtar oıynshysy Karlaýdyń qolyna dop tıip, tóreshi penaltı belgiledi. 11 metrlik núkteden Pedro Enrıke qatelesken joq. 1-taım 1:0 esebimen aıaqtaldy.Ekinshi bólimde tartys qyza tústi, qaýipti shabýyldar da molaıa berdi. Qonaqtar jıi qysqa pastarmen oınady. Al astanalyqtar dál pas berý jaǵynan kóp qatelik jiberdi.
Kıprlik ujym naǵyz qaýipti sátterge ıe boldy. Birde qaqpashy Nenad Erıch tamasha seıvterimen kózge tússe, keıde qorǵaýshylar senimdi oınady. Esesine gol soǵarlyqtaı sátter týyndatý qıyn boldy. Shabýyl shebinde Djýnıor Kabananga meılinshe belsendi boldy, ásirese áýedegi dopqa talastyń kópshiliginde basymdyq tanytty. Biraq 84-mınýtta bapker ony Rangelo ıAngaǵa almastyrdy. Biraq qarsylastyń qorǵanys shebin jaryp ótýdiń sáti túsken joq.
Oıynnyń negizgi ýaqyty «Astananyń» 1:0 esebindegi jeńisimen aıaqtaldy. Nıkosııadaǵy alǵashqy kezdesýde APOEL dál osy eseppen utqan bolatyn. Sondyqtan, danııalyq bas tóreshi ıAkob Kehlet komandalardy 15 mınýttan qosymsha eki taım oınaýǵa shaqyrdy. Biraq, birli-jarym shabýyldardy aıtpaǵanda, gol soǵýǵa qolaıly sátter bola qoıǵan joq. Ekinshi overtaımda kıprlikter sapynda G. Zahıdtiń ornyna alańǵa shyqqan Tomas de Vınchente alystan pármendi soqqy baǵyttady. Abyroı bolǵanda, qaqpashy onyń golǵa aınalýyna jol bermedi. Qaqpalarǵa gol soǵylmaǵandyqtan, jeńimpazdy penaltıler serııasy arqyly anyqtaýǵa týra keldi.
Fýtbol lotereıasynda kapıtan Nenad Erıch erlik tanytyp, eki soqqyny qaıtardy. Jalpy, penaltıler serııasynda «Astana» 2:1 esebinde jeńiske jetip, Eýropa lıgasynyń toptyq kezeńine shyqty.
Astana: Nenad Erıch (kapıtan), Dmıtrıı Shomko, Evgenıı Postnıkov, Marın Anıchıch, Antonıo Rýkavına, Ivan Maevskıı (ıÝ. Logvınenko), Laslo Klıaınhaısler (A. Beısebekov), Marın Tomasov, Pedro Enrıke, Serikjan Mujyqov (R. Almeıda), Jýnıor Kabananga (R. ıAnga).APOEL: Vaterman, Moraısh (kapıtan), Výros (S. Gentsoglý), Karlaý, Nsýe, Kadjý, Soýza, Shallaı, Al-Taamarı (Dj. Efrem), Zahıd (T. De Vınchentı), Gýchchanedjad (Dellatorre).
Foto: fcastana.kz
